កូនប្រុសនាយសង្កាត់រដ្ឋបាលព្រៃឈើស្រុកស្វាយលើត្រូវបានគេរាយការណ៍ថាកំពុងដឹកឈើយ៉ាងអាណាធិបតេយ្យ

ខេត្តសៀមរាប៖ លោក រ៉ា ដែលគេស្គាល់ថា ត្រូវជាកូនរបស់លោក ម៉ែន វុទ្ធី នាយសង្កាត់រដ្ឋបាលព្រៃឈើស្រុកស្វាយលើ បានកំពុងធ្វើសកម្មភាពដឹកជញ្ជូនឈើយ៉ាងអនាធិបតេយ្យចូលមកក្រុងសៀមរាប ដោយគ្មានញញឹតអ្វីទាល់តែសោះ។

ជាក់ស្ដែងកាលពីថ្ងៃទី២៣ ខែធ្នូ ឆ្នាំ២០២២ កន្លងទៅនេះ ប្រជាពលរដ្ឋបានប្រទះឃើញ ឈ្មោះ រ៉ា បានធ្វើសកម្មភាពដឹកជញ្ជូនឈើ តាមរថយន្តពីរកឹប ដែលមានស្លាកលេខ ខ.ម ដឹកឈើដោយមិនខ្វល់ពីសំណាញ់ច្បាប់។ ពលរដ្ឋដែលបានឃើញសកម្មភាពខាងលើ បានរិះគន់ចំៗទៅលើ លោក ម៉ែន វុទ្ធី ហៅ (ឡយ) នាយសង្កាត់រដ្ឋបាលព្រៃឈើ ដែលត្រូវជាឪពុកបង្កើតរបស់ឈ្មោះ រ៉ា ថាបានបណ្តែតបណ្ដោយឱ្យកូនរបស់ខ្លួន ធ្វើព្យុះធ្វើភ្លៀង មិនខ្លាចញញើតនឹងសំណាញ់ច្បាប់ ដោយអាងតួនាទីឪពុកនៅពីក្រោយខ្នងចាំជួយអន្តរាគមន៍ បើសិនមានសមត្ថកិច្ចពាក់ព័ន្ធដែលមានបំណងចង់បង្ក្រាប ឬចាប់កូនរបស់លោក។

ទាក់ទិននឹងករណីចោទប្រកាន់ខាងលើនេះដែរ លោក ម៉ែន វុទ្ធី ជានាយសង្កាត់រដ្ឋបាលព្រៃឈើស្រុកស្វាយលើ បានបញ្ជាក់ប្រាប់អង្គភាព Mekong New តាមមរយៈប្រព័ន្ធ Telegram នៅរសៀលថ្ងៃទី២៧ ខែធ្នូ ឆ្នាំ២០២២នេះថា “សុំទោសប្អូន អ្នករាយការណ៍នោះច្រឡំទេ គឺវាដឹកអុសទេ” ។

បើទោះបីជាយ៉ាងណា បើតាមពលរដ្ឋដែលរស់នៅក្បែរសង្កាត់រដ្ឋបាលព្រៃឈើស្រុកស្វាយលើ បានបង្ហើបទៀតថា សកម្មភាពដឹកជញ្ជូនឈើរបស់ឈ្មោះ រ៉ា គឺតាំងយូរណាស់មកហើយ តែគេមិនដែលឃើញមានសមត្ថកិច្ច ឬជំនាញស្ថាប័នណាបង្ក្រាបសូម្បីតែម្ដង។ ពលរដ្ឋស្នើឲ្យលោកនាយខណ្ឌរដ្ឋបាលព្រៃឈើខេត្តសៀមរាប ជួយត្រួតពិនិត្យឡើងវិញ និងមានវិធានការចំពោះមន្ត្រីក្រោមឱវាទខាងលើនេះផង៕ ប្រភពពី តារាជ្យ