ខ្សឹបដាក់ពាង៖ អ្នកណាទទួលខុសត្រូវចំពោះផ្លូវវង់តូចដាច់ខូចខ្ទេច

ប្រជាពលរដ្ឋ ភ្ញៀវទេសចរណ៍ជាតិ អន្តរជាតិ អ្នករតរឺម៉ក អ្នករតតាក់ស៊ី មគ្គុទេសទេសចរណ៍ បាននិយាយរិះគន់ថា សៀមរាបជាតំបន់ទេសចរណ៍ដ៏សំខាន់ក្នុងព្រះរាជាណាចក្រកម្ពុជា តែផ្លូវថ្នល់តាមប្រាសាទអង្គរវត្ត (ផ្លូវវង់តូច) ស្ថិតក្នុងឃុំនគរធំ ក្រុងសៀមរាប ខេត្តសៀមរាប ដាច់ខូចអស់តែគ្មានឃើញអ្នកណាគេធ្វើដឹងធ្វើលឺនោះទេ។

ក្រុមអ្នករិះគន់ខាងលើបានលើកឡើងថា ថវិការចំណូលជាច្រើនពីភ្ញៀវទេសចរណ៍ជារៀងរាល់ឆ្នាំមិនដឹងយកទៅ ណាបានជាទុកផ្លូវថ្នល់អោយដាច់ពិបាកធ្វើដំណើរបែបនេះទៅវិញ ដែលជាហេតុធ្វើអោយភ្ញៀវទេសចរណ៍ និងប្រជាពលរដ្ឋក្រវីក្បាលងឿងឆ្ងល់យ៉ាងខ្លាំង។

នៅរសៀលថ្ងៃទី១៧ខែសីហាឆ្នាំ២០១២នេះ ក្រុមអ្នករិះគន់ខាងលើបានទូរស័ព្ទ មកសុំអោយសារព័ត៌មានកម្ពុជាសុវណ្ណភូមិ ជួយចុះផ្សាយអំពីបញ្ហាខាងលើ ព្រោះពួកគាត់មិនដឹងទៅប្រាប់អ្នកណានោះទេ អំពីទុក្ខលំបាកទាំងនេះ។ ក្រុមអ្នករិះគន់បន្តចោទសួរថា តើអ្នកណាជាអ្នកទទួលខុសត្រូវ ក្នុងការជួសជុលផ្លូវថ្នល់ខាងលើ? តើជាទួនាទីរបស់អាជ្ញាធរខេត្ត ឬជាទួនាទីរបស់អាជ្ញាធរអប្សរា ឬជាទួនាទីរបស់ក្រុមហ៊ុនលក់សំបុត្រអង្គរ?

ក្រុមអ្នករិះគន់ខាងលើ សង្ឃឹមថាអាជ្ញាធរពាក់ព័ន្ធ គួរតែសាងសង់ ឬជួសជុលផ្លូវថ្នល់ដែលខូចខាតខាងលើអោយបានមុនរដូវភ្ញៀវទេស ចរណ៍មកទស្សនាច្រើននាពេលខាងមុខឆាប់ៗនេះ(High Season) ព្រោះពួកគាត់មិនចង់អោយភ្ញៀវទេសចរណ៍ ថតផ្តិតយករូបភាពផ្លូវដាច់បែកភគ់ដូចថ្លុកឈាម យកទៅចែកគ្នាគេមើលឯប្រទេសគេវិញនោះទេ។ ម្យ៉ាងវិញទៀតវាពិបាកធ្វើដំណើរទៅមក ហើយវាធ្វើអោយយានជំនិះឆាប់ពុកផុយដោយសារតែបើកបរកាត់ភគ់ជ្រាំ ដែលជាហេតុខាងបង់ថវិការរបស់ពួកគាត់ នាំអោយឈានទៅរក ភាពក្រីក្រខុសពីយុទ្ធសាស្រ្តរបស់រាជរដ្ឋាភិបាលកម្ពុជា៕