តុលាការសំរេចឃុំខ្លួនយោធាផ្កាយពីរ មនុស្សបីនាក់ទៀត ករណីជួញដូរគ្រឿងញៀន

ចៅក្រមស៊ើបសួរ សាលាដំបូងរាជធានីភ្នំពេញ កាលពីរសៀលថ្ងៃទី២៩ ខែសីហា ឆ្នាំ២០១២ បានសម្រេចឃុំខ្លួនយោធាផ្កាយពីរ ឈ្មោះ ចាន់ ឫទី្ធឌី មានមុខងារជានាយរងសេនាធិការកងទ័ពជើងគោក និងជាថៅកែភោជនីយដ្ឋានរស្មីបឹងកេងកង ព្រមទាំងឈ្មោះ ឌៀប ស៊ុនឡាយ ភេទប្រុស អាយុ ៥១ឆ្នាំ និងប្រពន្ធឈ្មោះ ញ៉ែម សុខា អាយុ ៤៩ឆ្នាំ មានមុខរបរជាម្ចាស់សំអាងការរតនាពេជ្រ ដាក់ពន្ធនាគារ ក្រោមការចោទប្រកាន់ពីបទ ជួញដូរនូវសារធាតុញៀនខុសច្បាប់។ ចំណែកបុរសអ្នកបើកបរថយន្ត ឈ្មោះ លៀប ឈុនរី អាយុ ២៨ឆ្នាំ ក៏ត្រូវតុលាការសម្រេចឃុំខ្លួនដែរ។ 

យោងតាម មាត្រា២៩ នៃក្រមព្រហ្មទណ្ឌ និងមាត្រា៤០ នៃច្បាប់ស្តីពីការត្រួតពិនិត្យគ្រឿងញៀន ឃើញថា មនុស្សទាំងបួននាក់នេះ ត្រូវប្រឈមមុខនឹងការជាប់ពន្ធនាគារពី ២០ឆ្នាំ ទៅ ៣០ឆ្នាំ និងអស់មួយជីវិត បើសិនជាតុលាការរកឃើញថា មានពិរុទ្ធភាពដូចការចោទប្រកាន់នេះមែន។

តាមចម្លើយ ឈ្មោះ ចាន់ ឫទី្ធឌី ជាចៅកែភោជនីយដ្ឋានរស្មីបឹងកេងកង ទើបនៅរសៀលថ្ងៃដដែលនោះ សមត្ថកិច្ចបានចុះឆែកឆេរភោជនីយដ្ឋានរស្មីបឹងកេងកង ដែលមានទីតាំងស្ថិតនៅសង្កាត់បឹងកេងកងទី១ ខណ្ឌចំការមន ប៉ុន្តែពុំបានរកឃើញអ្វីទេ។ តាមចម្លើយរបស់ឈ្មោះ ចាន់ ឫទី្ធឌី ដដែលនេះ នៅរសៀលថ្ងៃទី២៦ ខែសីហា ឆ្នាំ២០១២ សមត្ថកិច្ចបានចុះទៅឆែកឆេរ នៅផ្ទះសំអាងការរតនាពេជ្រ ដែលមានទីតាំងនៅភូមិត្រពាំងល្វា សង្កាត់កាកាប ខណ្ឌពោធិ៍សែនជ័យ ជាបន្តទៀត បានឃាត់ខ្លួនពីរនាក់ប្តីប្រពន្ធ មុខរបរសំអាងការរតនាពេជ្រ ហើយដកហូតបានគ្រឿងញៀនប្រភេទយ៉ាម៉ាចំនួន ៣៧១៩,៥ ក្រាម និងប្រភេទម៉ាទឹកកកមានចំនួន ៩៨៩,៩ ក្រាម ព្រមទាំងដកហូតរថយន្ដបាឡែនមួយគ្រឿង ពណ៌ទឹកប្រាក់ និងជញ្ជីងសម្រាប់ថ្លឹងគ្រឿងញៀនមួយគ្រឿងផងដែរ៕ ដោយ CCKNEWS