មន្ត្រីរាជការត្រូវបានរាជរដ្ឋាភិបាលឲ្យឈប់សម្រាកនៅថ្ងៃប្រជុំអាស៊ានថ្ងៃទី១៩-២០វិច្ឆិកា

មន្ត្រីរាជការ​តាម​ស្ថាប័ន​ក្រសួង​មន្ទីរ​នានា ក្នុង​រាជធានី​ភ្នំពេញ នឹង​ត្រូវ​បាន​ឈប់សំរាក​ការងារ​រយ​:​ពេល ២ ថ្ងៃ នៅ​ថ្ងៃ​ច័ន្ទ​ទី ១៩ និង​ថ្ងៃ​អង្គារ ទី​២០ ខែវិច្ឆិកា ឆ្នាំ​២០១២​។ ការ​ឈប់សម្រាក​នេះ ដើម្បី​បញ្ចៀស​បញ្ហា​កកស្ទះ​ចរាច​រណ៍ ក្នុង​កិច្ចប្រជុំ​កំពូល​អាស៊ាន លើក​ទី ២១ និង​កិច្ចប្រជុំ​កំពូល​ពាក់ព័ន្ធ​ជាច្រើន​ទៀត នៅ​រាជធានី​ភ្នំពេញ​។ នេះ​បើ​តាម​ប្រសាសន៍​របស់​សម្តេច​នាយក​រដ្ឋមន្ត្រី ហ៊ុន សែន ក្នុង​ពិធី​ចែក​ប័ណ្ឌកម្មសិទ្ធិ​ដីធ្លី នៅ​ស្រុក​ឱ​រ៉ា​ល់ ខេត្ត​កំពង់ស្ពឺ កាលពី​ព្រឹក​ថ្ងៃទី​១៤ ខែវិច្ឆិកា ឆ្នាំ​២០១២​។​

ថ្ងៃទី 14 វិច្ឆិកា 2012
ដោយ: លី សិលា
CEN

សម្រាប់​ចូលរួម​សម្រួល​ចរាចរណ៍​កកស្ទះ​តាម​ដងផ្លូវ ក្នុង​រាជធានី​ភ្នំពេញ រាជរដ្ឋាភិបាល​ក៏បាន​សម្រេច​ឲ្យ​សាលារៀន និង​គ្រឹះស្ថាន​សិក្សា ចំនួន ១៩ នៅ​ភ្នំពេញ ពិសេស​សាលារៀន តាម​ដង​មហាវិថី​សហព័ន្ធរុស្ស៊ី ពី​ព្រលាន​យន្តហោះ មកកាន់​វិមាន​សន្តិភាព ដែល​ជា​កន្លែង​រៀបចំ​កិច្ចប្រជុំ​កំពូល​អាស៊ាន បាន​ឈប់សម្រាក ចាប់ពី​ថ្ងៃ​ទី​១៦ ដល់​ថ្ងៃ​ទី​២១ ខែវិច្ឆិកា ឆ្នាំ​២០១២​។​

​រីឯ​កំណាត់​ផ្លូវ​មួយចំនួន ក៏​ត្រូវ​បិទ​ចរាចរណ៍ ដើម្បី​សម្រួល​ដល់​ដំណើរ​ឆ្លងកាត់ របស់​គណៈប្រតិភូ​អាស៊ាន និង​បណ្តា​មេដឹកនាំ​ប្រទេស​ដៃគូ​អាស៊ាន សរុប​ចំនួន ១៧ ប្រទេស ដែល​គ្រោង​នឹង​មក​កាន់​រាជធានី​ភ្នំពេញ ជា​បន្តបន្ទាប់ ចាប់ពី​ថ្ងៃ​ទី​១៥ ដល់​ថ្ងៃ​ទី​២០ ខែវិច្ឆិកា ឆ្នាំ​២០១២៕​