ព្រះសង្ឃ១០០អង្គនិមន្តទៅសូត្រមន្តរំដោះគ្រោះ

ប្រភព​ព័ត៌​មានពីមន្ត្រី​នគរបាល​ចរាចរ​ខេត្ត​ព្រះ​សីហ​នុ​ ​​​បាន​ឱ្យ​ដឹងថា ​ពិធីសូត្រមន្ត​ដែល​ប្រព្រឹត្ត​ឡើង​ខាងលើ​នេះ​ធ្វើ​ក្នុង​រយៈពេល​ប្រមាណ​១​ ម៉ោង​ហើយ​ក៏​មាន​ក្រុម​គ្រួសារ​របស់​សាច់​ញត្តិ​ ​អ្នករបួស និង​ស្លាប់ព្រមទាំងក្រុមគ្រួសារនាយ​កុយ​ចូលរួម​ផង​ដែរ ​ដើម្បី​ឧទ្ទិស​កុសលផល​បុណ្យ​ទៅ​ឲ្យ​កូន​របស់​លោក​ ឈ្មោះ​ជី​ វី​រៈ​ ដែល​បាន​ទទួលមរណភាព​គ្រា​ដែល​ធ្វើ​ដំណើរ​ជាមួយនឹង​ក្រុម​សិល្បៈ​របស់​លោក​តារាចម្រៀង​ ខេមរៈ​ សេរី​មន្ត.។

សាច់​ញត្តិ​របស់​អ្នករបួស និង​ស្លាប់ ក្នុង​ឧបទ្ទវហេតុ គ្រោះថ្នាក់​ចរាចរណ៍ លើ​កំណាត់​ផ្លូវជាតិ​លេខ​៤ ដោយ​រថយន្ត​ឆេះ​ស្លាប់​មនុស្ស​៧​នាក់ និង​របួស ៧ នាក់  ដែល​មាន​អ្នកចម្រៀង លោក ខេមរៈ សិរី​មន្ត រងរបួស​ផង​នោះ បាន​និមន្តព្រះសង្ឃ​​នៅភ្នំពេញ  និង​​ព្រះ​សង្ឃ​នៅ​​ខេត្ត​​ព្រះ​សីហនុចំនួន១០០​អង្គ​ ទៅសូត្រ​មន្តស្រោច​ទឹក​រំដោះ​នៅតាម​ផ្លូវជាតិ​លេខ​៤ ​នា​រសៀល​ថ្ងៃទី​​១០ ខែមីនា ឆ្នាំ២០១៣ ៕​