ឌុច សុភា បកស្រាយ​តែអត់សុំ​ទោស​អ្នក​កាសែត​ទេ

តារាសម្ដែងមេម៉ាយក្ដៅស្រួយ អ្នកនាង ឌុច សុភា បានចេញមុខបកស្រាយរឿងគេចោទថា នាងមើលងាយ និងបន្ទាបបន្ថោកអ្នកសារព័ត៌មាន ខណៈលោក អែនឌី  បានចេញមុខសុំទោសជាសាធារណៈរួចរាល់ទៅហើយនោះ បន្ទាប់ពីលោកយល់ថា សកម្មភាពកន្លងមកនោះរបស់លោក ជាការវាយប្រហារធ្ងន់ធ្ងរមិនអាចទទួលយកបាន សម្រាប់អ្នកសារព័ត៌មាន។

នៅក្នុងជំនួបតាមទូរស័ព្ទថ្មីៗនេះ តារាសម្ដែង អ្នកនាង ឌុច សុភា បានទទួលស្គាល់ថា ពាក្យសម្ដីមួយចំនួនដែលនាងបាននិយាយនៅក្នុងកម្មវិធី “CTN ប៉ុស្តិ៍លេខ២១” ហាក់ដូចជាពិបាកស្ដាប់បន្តិចមែន។ ប៉ុន្តែអ្វីដែលនាងចង់និយាយនាពេលនោះ នាងអះអាងថា មិនមានចេតនានិយាយសំដៅលើអ្នកកាសែតទាំងអស់នោះទេ។ ឌុច សុភា លើកឡើងថា៖ “ខ្ញុំដឹងថា ពួកគាត់មួយចំនួនពុំបានគោរពយ៉ាងត្រឹមត្រូវនូវក្រមសីលធម៌ វិជ្ជាជីវៈសារព័ត៌មានទេ។ តែអ្វីដែលខ្ញុំលើកឡើងនេះ គឺសំដៅតែអ្នកសារព័ត៌មានតែពីរបីនាក់ប៉ុណ្ណោះ”។

ឌុច សុភា បានបន្តថា អ្នកកាសែតមួយក្ដាប់តូច ហាក់ដូចជាចងមុង ហើយដេកសរសេរតាមការស្រមៃ ដោយមិនបានសម្ភាសន៍សាមីខ្លួនឡើយ។ នាងបាននិយាយថា៖ “រឿងនោះមិនមែនជាការលេងសើចទេ តែជាការពិត។ មានបណ្ដាញព័ត៌មានមួយចំនួនបានចុះផ្សាយពីខ្ញុំ ភាគច្រើនមិនមាននរណាម្នាក់ទូរស័ព្ទមកសួរនាំពីខ្ញុំឡើយ។ បើបានសួរនាំតែមួយម៉ាត់ ក៏អស់ចិត្តដែរ”។

ទោះបីជាយ៉ាងណា តារាសម្តែងចាស់វស្សារូបនេះ មិនបានទទួលស្គាល់ ឬគិតថាខ្លួនឯងខុសនោះទេ តែនាងបានលើកហេតុផលថា ដោយសារតែនាងមានការឈឺចិត្តខ្លាំងពេក ខណៈដែលបានឃើញតារាមួយចំនួនជួបនាងដោយសម្រក់ទឹកភ្នែក ពិបាកចិត្តដោយសារតែការចុះផ្សាយព័ត៌មានមិនពិតពីពួកគេ។ ដោយឡែកសម្រាប់នាងវិញ នាងបានបន្តថា ពេលទៅណាមកណា នាងមិនដែលមាននរណាសួរនាំពីការងារ ឬសុខទុក្ខនោះទេ។ តែផ្ទុយទៅវិញ សំនូរពីអ្នកសារព័ត៌មានភាគច្រើនគឺ “តើមានប្ដីមួយទៀតហើយ ឬនៅ? នៅផ្ទះធម្មតា ឬក៏វិឡា? នរណាទិញឲ្យ? ឡានដូរឬនៅ?” ជាដើម។ នាងបានបន្តទៀតថា សូម្បីពេលខ្លះគ្រាន់តែនាងដើរជាមួយប្អូនប្រុសក៏គេថា ជាសង្សារហើយយកទៅចុះផ្សាយដែរ។

គេមិនបានដឹងថា ការចំណាយពេលដ៏ខ្លី លាងសម្អាតពាក្យសម្ដីរបស់អ្នកនាង ឌុច សុភា ប៉ុន្មានម៉ាត់នេះ អាចស្អំដួងចិត្តរបស់អ្នកកាសែតដែលកំពុងតែក្ដៅងំឲ្យត្រជាក់មក វិញបាន ឬយ៉ាងណានោះទេ ខណៈមុននេះបន្តិច នាង និងលោក អែនឌី បានរួមដៃគ្នាយកវេទិកា CTN ធ្វើជាទីតាំងវាយប្រហារទៅលើអ្នកសារព័ត៌មានទាំងឡាយយ៉ាងចាស់ដៃ ថាមិនមានក្រមសីលធម៌វិជ្ជាជីវៈ និងសរសេរនូវព័ត៌មានបំផ្លើស ទាក់ទងទៅនឹងរឿងរ៉ាវឯកជនរបស់ពូកគេ។

ទំនងដោយយល់ថា អ្វីដែលខ្លួនបានធ្វើនៅកញ្ចក់ទូរទស្សន៍ CTN នោះដូចជារមិលគុណពេកចំពោះអ្នកសារព័ត៌មានដែលធ្លាប់លើកតម្កើង ពួកគេឲ្យមហាជនស្គាល់នោះ  លោក អែនឌី ក៏បានចេញមុខសុំទោសវិញតាម Facebook និងតាមសារព័ត៌មានមួយចំនួនវិញនាប៉ុន្មានថ្ងៃក្រោយមក។ ដោយឡែក ឌុច សុភា បើទោះជាក្នុងគ្រាជាមួយគ្នានោះ បានអះអាងថា នាងមិនស្វាគមន៍ចំពោះអ្នកកាសែតនោះទេ ព្រោះតែអ្នកកាសែតទាំងអស់ មិនដែលសួរនាំ ឬសរសេរពីអ្វីដែលល្អពីនាងសោះ គឺមានតែរឿងអាក្រក់ដែលទាក់ទងជីវិតឯកជនរបស់នាងនោះ ដូច្នេះនាងអត់បានធ្វើដូច អែនឌី ត្រូវចេញសុំទោសអ្នកសារព័ត៌មានទេ។ នៅក្នុងជំនួបជាមួយ Sabay ពេលនេះ នាងក៏មិនបានបន្លឺពាក្យសុំទោសមួយម៉ាត់ណាដល់អ្នកសារព័ត៌មានដែរ។

បើទោះជាលើកញ្ចក់ទូរទស្សន៍ CTN នាងទទួលស្គាល់ថា បានវាយប្រហារធ្ងន់សំដៅអ្នកកាសែតពិតមែនក៏ដោយ តែនោះ មិនសំដៅអ្នកសារព័ត៌មានទាំងឡាយក្នុងស្រុកពិសេស គឺអ្នកសារព័ត៌មានដែលមានក្រមសីលធម៌ និងវិជ្ជាជីវៈនោះទេ គឺនាងសំដៅ តែអ្នកសារព័ត៌មានមួយក្តាប់តូច ដែលចងមុងសរសេរអត់សួរនាំនាងប៉ុណ្ណោះ។

បើទោះជានាងអះអាងបែបនេះ ប៉ុន្តែអ្នកសារព័ត៌មានពីរបីនាក់ បានលើកឡើងថា ការលើកឡើងរបស់ ឌុច សុភា ថាអ្នកសារព័ត៌មានចងមុងសរសេរអត់ខ្វល់សួរនាំនាងនោះ គឺគ្រាន់តែជាការដោះសារយករួចខ្លួនប៉ុណ្ណោះ ព្រោះនៅពេលពួកគេទូរស័ព្ទទៅសួរនាំនាង គឺលទ្ធផលមានពីរប៉ុណ្ណោះ ទី១លេខដែលនាងធ្លាប់ប្រើ ប្រែជាតេមិនចូលព្រោះនាងរមែងប្ដូរលេខទូរស័ព្ទដូចខោអាវ។ ដោយឡែកលទ្ធផលទី២ គឺបើទោះជា ទូរស័ព្ទ Call ចូលហើយ តែនាងនឹងបិទវិញនៅពេលដឹងថាអ្នកកាសែតចង់សួរនាំនាងពីរឿងឯកជន របស់នាង ហើយបើមិនដូច្នេះទេ គឺនាងមិនលើកតែម្ដង…។

អ្នកសារព័ត៌មានមួយក្រុមតូចដដែល ដែលទំនងយល់ថា ការវាយប្រហារកន្លងមករបស់ ឌុច សុភា សំដៅពួកខ្លួន បានលើកឡើងបន្តថា បើទោះព័ត៌មានខ្លះរបស់ពួកគេត្រូវចេញផ្សាយដោយមិនអាចចាំការ អធិប្បាយរបស់សាមីខ្លួន ឌុច សុភា បាន ដោយសំអាងថា មានប្រភពរឿងខ្លះៗហើយ គ្រាន់តែចង់បានការអធិប្បាយពីសាមីខ្លួនដើម្បីបង្គ្រប់កិច្ច វិជ្ជាជីវៈ ខណៈសាមីខ្លួនគេចវេសនោះ ពួកគេសុទ្ធតែបានបន្សល់ទុកនូវឃ្លាខ្លីមួយនៅចុងបញ្ចប់នៃអត្ថបទ ថា “នឹងរង់ចាំ ឬក៏ស្វាគមន៍រាល់ការចេញមុខបកស្រាយពីសាមីខ្លួន នាពេលក្រោយ” ដែរ ហើយនេះ ក៏ជាផ្នែកមួយនៃវិជ្ជាជីវៈអ្នកសារព័ត៌មានដូចគ្នា។ ដូច្នេះ បើព័ត៌មានពួកគេចេញផ្សាយហើយ យល់ថា ខ្លួនមិនមានអ្វីដូចនឹងព័ត៌មាននោះ អាចធ្វើការបកស្រាយតាមក្រោយបាន ហើយពួកគេនឹងរីករាយចុះផ្សាយជូនតាមការបកស្រាយរបស់នាង។

ទស្សនិកជនបានលើកឡើងដែរថា ឌុច សុភា មិនគួរធ្វើទង្វើរមិលគុណចំពោះអ្នកកាសែតដូច្នេះទេ ព្រោះយ៉ាងហោចណាស់ អ្នកកាសែតក៏ជាអ្នកផ្សាយដំណឹងពីនាងឲ្យមហាជនដឹងដែរ ទោះល្អក្ដីមិនល្អក្ដី តែនេះជាវិជ្ជាជីវៈ ព្រោះអ្នកកាសែតត្រូវផ្សាយដំណឹងទាំងអស់(ទាំងល្អ និងអាក្រក់)ដោយមិនជាប់និន្នាការអ្វីឡើយ ពីសិល្បករដែលជាមនុស្សរបស់មហាជន ។ ដូច្នេះបើដឹងថាខ្លួនខុសហើយ កុំរឹងត្អឹងពើងទ្រូងថាខ្លួនឯងត្រូវ សុខចិត្តសុំទោសមួយម៉ាត់ ដូចលោក អែនឌី នោះជឿថា ពួកគាត់(អ្នកកាសែត)ទទួលយកដោយការសុខចិត្តបាត់ទៅហើយ៕

អត្ថបទ៖ សំ ជំនាញ
កែសម្រួល៖ ទារិកា