បើបុរសណាអាចយកឈ្នះបេះដូងនាងបាន នោះនឹងបាន៦០លានដុល្លា

កូនស្រីមហាសេដ្ឋីហុងកុង ត្រូវបានបុរសៗចោមរោមសម្រុកចូល សុំនាងរៀបការ បន្ទាប់ពីឪពុករបស់នាងប្រកាសថា បើបុរសណាអាចឈ្នះបេះដូងនាងបាន នោះលោកនឹងឲ្យ៥០០លានដុល្លាហុងកុង (ជាង៦០លានដុល្លាសហរដ្ឋអាមេរិក) ជាកាដូនៃថ្ងៃរៀបការ។

ឆៅ ជីជី អាយុ៣៣ឆ្នាំ បាននិយាយថា នាងបានទទួលពាក្យសុំរៀបការរាប់ពាន់ ព្រមទាំងរូបភាពអាក្រាតៗ ដែលបានផ្ញើមក សូម្បីតែរូបបុរសដែលមានកាយសម្បទាសង្ហារជាងតារាហូលីវូតGeorge Clooneyពីរដង។

បុរសដែលបានស្នើសុំនាងរៀបការនោះ រាប់ចាប់ពីនៅប្រទេសនីហ្សេរីយ៉ា ដល់ប្រទេសឥណ្ឌា បានរត់មកឈរជើងគ្នា បន្ទាប់ពីឪពុកនាងឈ្មោះ ឆៅ ស៊េស៊ី អាយុ៧៦ឆ្នាំ បានប្រកាសថានឹងផ្តល់៥០០លានដុល្លាហុងកុង ជាកាដូអាពាហ៍ពិពាហ៍ កាលពីថ្ងៃពុធសប្តាហ៍កន្លងទៅនេះ។

ជាមួយនឹងពាក្យចចាមអារាមថ្មីៗ ឆៅ ជីជី ដែលមានមុខងារជានាយកប្រតិបត្តិនៅក្រុមហ៊ុនឪពុករបស់នាង ត្រូវបានគេរាយការណ៍ឲ្យដឹងថា នាងបានរៀបការជាមួយស្រីដូចគ្នា ឈ្មោះ ស៊ាន អ៊ៀវ នៅព្រះវិហារ ដោយលួចលាក់កាលពីខែមេសា ក្នុងទីក្រុងប៉ារីស ប្រទេសបារាំង។

ស៊ាន អ៊ៀវ (ខាងឆ្វេង) និង ជីជី (ខាងស្តាំ)

ប៉ុន្តែឆៅ ជីជី បានបដិសេធ សុំមិនធ្វើការបកស្រាយ អំពីពាក្យចចាមអារាមនេះ។

ទន្ទឹមនឹងនេះ ឪពុករបស់នាងក៏បានប្រាប់សារព័ត៌មាន The South China Morning Post ថាព័ត៌មានដែលថាកូនស្រីរៀបការនោះ មិនពិត។

ខាងក្រោមនេះ ជាប្រតិកម្មរវាងឆៅជីជី ជាកូន និងឆៅស៊េស៊ី ជាឪពុក ដែលបានធ្វើការឆ្លើយតបទៅនឹងសារព័ត៌មាន៖

ឆៅ ជីជី

ឆៅ ជីជី បាននិយាយថា នាងមិនខឹងទេ ដែលឪពុកនាងចង់ផ្លាស់ប្តូរនាង ដោយការយកលុយមកដោះស្រាយបែបនេះ។

«ខ្ញុំមិនខឹងអីទេ។ គ្រាន់តែមិនដឹងថានិយាយយ៉ាងម៉េច បើប៉ាខ្ញុំគាត់បានប្រកាសចឹងទៅហើយ។ ទោះជាប្រឆាំង ក៏មិនបានផល! ច្បាស់ជាគាត់បកមកវិញថា៖ “កូន! ប៉ាស្រលាញ់កូនប៉ុណ្ណឹងហើយ តើកូនចង់បានអីទៀត?”»

«ប៉ា និងខ្ញុំ ស្និតណាស់! ពួកយើងចូលចិត្តជជែកគ្នា អំពីបញ្ហាជីវិត និងស្នេហាជាមួយគ្នា ហើយពួកយើងឃើញមុខគ្នាតែញឹក នៅកន្លែងធ្វើការ។»

«ជាក់ស្តែង ដាច់ខាតគាត់មិនទទួលស្គាល់ថា កូនរបស់គាត់ជាមនុស្សស្រីស្រលាញ់ស្រីដូចគ្នាជាចំហឡើយ។ បើត្រឹមតែតាមការរស់នៅជាមួយគ្នាធម្មតាអី ធ្វើម៉េចក៏ធ្វើចុះ តាមដែលចិត្តចង់ តែបើជាលក្ខណៈចំហឲ្យសង្គមអីដឹងឮនោះ ហាមដាច់ខាត។»

មុននេះបន្តិច ចំពេលដែលមានពាក្យស្នើសុំនាងឲ្យរៀបការជាមួយ មកពីគ្រប់ទិសទី ឆៅ ជីជីបានសរសេរនៅលើទំព័រហ្វេសប៊ុករបស់ខ្លួនថា៖ «ទាន់ពេលដែលវិចារណញាណរបស់កូននៅមាន សូមប៉ារំសាយនូវការប្រកាសនោះចោលជាបន្ទាន់!!!»។

ឆៅ ស៊េស៊ី

លោក ឆៅ ស៊េស៊ី ពាក់វ៉ែនតាពណ៌ខ្មៅ ដងធ្វើអំពីមាស បានផ្តល់បទសម្ភាសន៍ឲ្យអ្នកយកព័ត៌មានប៉ុស្តិ៍ទូរទស្សន៍ថា៖ «អ្វីៗដែលខ្ញុំបានធ្វើ គឺចង់់ធ្វើឲ្យល្អបំផុត សម្រាប់ជីជី ហើយយើងក៏មិនជំទាស់ ឬក៏បង្ខំអ្វីដែរ។ គឺតាមចិត្តរបស់នាង។ ប៉ុន្តែគ្រាន់តែចង់ឲ្យនាងផ្តល់ឱកាសឲ្យខ្លួនឯងផងដែរ»។

លោក ឆៅ ស៊េស៊ី

លោកបន្ថែមទៀតថា មានបុរសប្រហែលជាង១០០នាក់ បានមកទាក់ទងគាត់ដល់ការិយាល័យ។

«ខ្លះ គេផ្ញើសំបុត្រមក ខ្លះអ៊ីមេល ឯខ្លះទៀតក៏ផ្ញើហ្វាក់មក។ ខ្ញុំអត់ទាន់មានពេលបានអានទេ។ ខ្ញុំនឹងយករឿងនេះ ទៅពិគ្រោះជាមួយជីជី»។

«អ្នកខ្លះថា គេអត់ចង់បានលុយទេ តែគេចង់មានឱកាសទាក់ទងជាមួយកូនស្រីខ្ញុំ។»

លោកឆៅ ជីជី ថ្មីៗនេះ ឧស្សាហ៍ឃើញលោកលេចមុខទៅតាមបណ្តាកម្មវិធីផ្សេងៗ ជាមួយនឹងស្រីកំណាន់ថ្មីៗរបស់លោក។ លោកត្រូវបានគេឲ្យដឹងថា លោកមានស្រីកំណាន់ជាងមួយម៉ឺននាក់៕ ប្រ​ភព​ពី ខេមបូឌាផេក

________________

ប្រែសម្រួល៖ អាពៅ

ប្រភព៖ SkyNews