គ្រួសារស្មៀនឃុំមានគ្នាបីនាក់ត្រូវគេសម្លាប់ដុតទាំងមនុស្សដុតទាំងផ្ទះដើម្បីបំផ្លាញភស្តុតាង

មនុស្ស​មួយគ្រួសារ​មាន​គ្នា​បីនាក់​ ត្រូវ​បាន​ឃាត្តករ​សម្លាប់ចង​ផ្អោប​គ្នា ​និង​ដុតទាំង​​ផ្ទះទាំង​មនុស្ស​​បំផ្លាញ​ភស្តុតាង នៅ​យប់រំ​លង​អា​ធ្រាត្យ ​ថ្ងៃទី២០​ឈានចូល​ទី២១​ ខែវិច្ឆកា​ ឆ្នាំ២០១៤នេះ ដែល​គ្រួសារជន​រង​គ្រោះ​​​ត្រូវ​បាន​គេ​ស្គាល់​ថា ជា​ស្មៀនឃុំ​សាលា​ក្រៅ ស្រុក​សាលា​ក្រៅ ខេត្ត​ប៉ៃ​លិន ​។

នគរបាល​ស្រុក​សាលា​ក្រៅ​បានឲ្យដឹងថា ជនរងគ្រោះ​មានឈ្មោះ ហេង រ៉ាវី អាយុ​២៧​ឆ្នាំ ដែល​បំរើការ​ជា​ស្មៀនឃុំ​នៅ​ឯ​ឃុំ​ខាងលើ​ ហើយ​​ករណី​ឃាតកម្ម​និង​ដុត​មនុស្ស​និង​ផ្ទះ​បាន​កើតឡើង នៅ​ភូមិកូនដំរី ឃុំ​អូរអណ្តូង ស្រុក​សាលា​ក្រៅ​ខេត្ត​ប៉ៃលិនដែល​គេហដ្ឋានរបស់​ក្រុម​គ្រួសារខាងលើ។​​

អាជ្ញាធរ​បាន​អោយដឹង​ថា​នៅវេលា​ម៉ោង​១​និង​១៥​នាទី​យប់​ឈានចួល​ថ្ងៃ​ទី​២១ ខែ​វិច្ឆិកា​ មនុស្ស​មួយ​គ្រួសារ របស់​ស្មៀនឃុំ​ដែល​មាន​ចំនួន​៣​នាក់ រួម​ទាំង​ប្រពន្ធ​ម្នាក់​ឈ្មោះ ធី ផល្លៃ និង​កូនប្រុស​អាយុ​៦​ខែ ឈ្មោះ ហេង ម៉េង​ជូ ត្រូវបាន​ឃាតករ​សម្លាប់​ដោយ​យក​ខ្សែលួស​ចងក ហើយ​ដុត​មនុស្ស​និង​ផ្ទះ​ជាមួយ​បន្ថែមទៀត​។ 

សមត្ថកិច្ច​សន្និដ្ឋាន​ជំ​ហ៊ាន​ដំបូង​ថា​ឃាតកម្ម​ដ៏​សាហាវ​នោះ​គឺ​អាច​ជា​រឿង​គំនុំ​មិនមែន​សកម្មភាព​ប្លន់​នោះទេ​ព្រោះ​គេ​បាន​រកឃើញ​លុយ​ជាង​មួយ​ម៉ឺន​ដុល្លារ​បាន​ត្រូវ​ភ្លើង​ឆេះ​ផងដែរ ៕