ប្រភពព័ត៌មានពីស្រុកត្រពាំងប្រាសាទ ខេត្តឧត្តរមានជ័យបានរាយការណ៍មកថា មេប៉េអឹមស្រុកត្រពាំងប្រាសាទបានឃាត់ខ្លួនអ្នកកាសែតម្នាក់ឈ្មោះ ខៀវ សុផានុរស្ស តាំងពីម៉ោងជាង១រសៀល រហូតដល់ល្ងាច ថ្ងៃទី១២ ខែមិថុនា ឆ្នាំ២០១៦នេះ មិនទាន់ដោះលែងនៅឡើយទេ ដោយខឹងនិងអ្នកកាសែតទៅថតឡានរបស់ខ្លួន ក្នុងខណៈពេលក្រុមប៉េអឹមស្រុកត្រពាំងប្រាសាទទៅចាប់ម៉ូតូច្រឡំ។
លោក ខៀវ សុផានុរស្ស អាយុ៣៣ឆ្នាំជាអ្នកឆ្លើយឆ្លងព័ត៌មានអោយទូរទស្សន៍អប្សរាប្រចាំស្រុកអន្លង់វែងខេត្តឧត្តរមានជ័យ និងជាអតីតជាអ្នកយកព័ត៌មានអោយសារព័ត៌មានកម្ពុជាសុវណ្ណភូមិប្រចាំខេត្តឧត្តរមានជ័យ បច្ចុប្បន្នស្នាក់នៅស្រុកអន្លង់វែង ត្រូវបានកម្លាំងប៉េអឹមស្រុកត្រពាំងប្រាសាទ ឃាត់ខ្លួនភ្លាមៗយកទៅសាកសួរបន្ទាប់ពីលោក សុផានុរស្ស បានទៅថតរថយន្តប៉េអឹមខាងលើដែលបានទៅចាប់ម៉ូតូច្រឡំដែលចោរបានលួចមួយគ្រឿងច្រឡំ។
ប្រភពព័ត៌មានច្បាស់ការបានប្រាប់តាមទូរស័ព្ទនៅម៉ោង៣និង៣០នាទីថ្ងៃទី១២ដដែលនេះថា កាលពីប៉ុន្មានថ្ងៃមុននេះមានចោរបានលួចកាច់សោម៉ូតូមួយគ្រឿងដែលមានស្លាកលេខ 4267 លុះដល់ព្រឹកថ្ងៃទី១២នេះខាងប៉េអឹមស្រុកត្រពាំងប្រាសាទបានបើករថយន្តទៅចាប់ម៉ូតូមួយគ្រឿងច្រឡំដែលពាក់ស្លាកលេខ 2067 រួចក៏បានដោះលែងទៅវិញ។ ប្រភពបន្តថា ឃើញដូច្នេះលោក ខៀវ សុផានុរស្សបានទៅថតរូបភាពយកព័ត៌មានតាមវិជ្ជាជីវៈដោយថតទាំងរថយន្តរបស់ប៉េអឹមផង ទើបបណ្តាលអោយខាងប៉េអឹមខឹងសម្បាក៏នាំខ្លួនអ្នកកាសែតទៅស្នាក់ការប៉េអឹមស្រុកត្រពាំងប្រាសាទសាកសួរតាំងពីម៉ោង១រសៀលរហូតដល់ម៉ោងជាង៤ល្ងាចនេះមិនទាន់ដោះលែងនៅឡើយទេ។
លោក លី ណារិទ្ធ មេប៉េអឹមស្រុកត្រពាំងប្រាសាទបានប្រាប់តាមទូរស័ព្ទនៅល្ងាចម៉ោង៦និង១១នាទីនេះថា លោកនៅឯភ្នំពេញ ហើយសាច់រឿងឃាត់ខ្លួនអ្នកកាសែតខាងលើលោក គង់ សម្បត្តិ ស្តីទីរបស់លោកកំពុងសាកសួរមិនទាន់ចប់នៅឡើយទេ។ លោកលីណារិទ្ធបន្ថែមថា រឿងថតឡានប៉េអឹមមិនជារឿងដើមចមក្នុងការឃាត់ខ្លួននោះទេ តែមានឈ្មួញរកស៊ីដឹកឈើគេប្តីថា លោក ខៀវ សុផានុរស្ស ទៅកំហែងទាប្រាក់គេ។
កម្ពុជាសុវណ្ណភូមិបានខលទូរស័ព្ទទៅលោក គង់សម្បត្តិ ប្រធានស្តីទីប៉េអឹមស្រុកត្រពាំងប្រាសាទ និងលោក គយ កាន់យ៉ា ព្រះរាជអាជ្ញាសាលាដំបូងខេត្តឧត្តរមានជ័យនៅម៉ោង៦ថ្ងៃទី១២ដដែលនេះដើម្បីសុំសាកសួរព័ត៌មានពាក់ព័ន្ធនិងការចាប់ខ្លួនអ្នកកាសែតខាងលើតែមិនមានអ្នកលើកទូរស័ព្ទ។
លោក ខៀវ សុផានុរស្ស បានប្រាប់កម្ពុជាភូមិតាំងពីព្រឹកម៉ៅងម៉ោង៩ថ្ងៃទី១២នេះថា កាលពីថ្ងៃទី១១ម្សិលមិញមានរថយន្តដឹកឈើមួយគ្រឿងដឹកសុទ្ធតែឈើថ្មី តែបែជារតច្បាប់ជាឈើផ្ទះចាស់ទៅវិញ ឃើញដូច្នេះអ្នកកាសែតជិត១០នាក់បានទៅថតរូបបម្រុងហៅមេព្រៃអោយចាប់តែអ្នករតការឡានដឹកឈើខាងលើប្រាប់ថា មិនបាច់ហៅមេព្រៃទេសុទ្ធតែខ្មែរដូចគ្នា យកលុយម្នាក់ពីរម៉ឺនចាក់សាំងទៅ ហើយឈើនេះជាកូនចៅរបស់លោកអភិបាលស្រុកអន្លង់វែងផង គួរមានការយល់យោគខ្លះផង។ លោកនុរស្សបន្ថែមថា លុះដល់រថយន្តដឹកឈើទៅបាត់ស្រាប់តែព្រឹកមិញនេះលឺពាក្យចចាមអារាមតាមតុការហ្វេថា កូនចៅលោកចៅហ្វាយស្រុកអន្លង់វែងគំរាមថា ចៅហ្វាយស្រុកខឹងខ្លាំងណាស់ ហើយបម្រុងអោយឈ្មួញដឹកឈើខាងលើដាក់ពាក្យប្តីថាក្រុមអ្នកកាសែតទៅជំរិតទាប្រាក់អ្នកដឹកឈើផ្ទះចាស់ទៅវិញ។ លុះស្រាប់តែប៉ុន្មានក្រោយមកលេចលឺព័ត៌មានថា មានការចាប់ខ្លួនលោក ខៀវ សុផានុរស្ស ដូចការគំរាមពីក្រុមអ្នករកស៊ីដឹកឈើ ដែលអួតខ្លួនថា ជាកូនចៅរបស់លោកចៅហ្វាយស្រុកដូចការគ្រោងទុក។
សូមបញ្ជាក់ថា អ្នករកស៊ីស្លូនត្រង់នៅស្រុកអន្លង់វែងធ្លាប់បានប្រាប់កម្ពុជាសុវណ្ណភូមិថា លោក ខៀវ សុផានុរស្ស ជាអ្នកកាសែតម្នាក់សកម្មខាងហៅសមត្ថកិច្ចអោយចាប់រថយន្តដឹកឈើខុសច្បាប់ ដែលជាហេតុធ្វើអោយមានការប៉ះទង្គិចជាមួយក្រុមឈ្មួញ និងមន្ត្រីរាជការលេមលើមមួយចំនួនដែលបានទទួលលាភសការៈពីក្រុមឈ្មួញអ្នករកស៊ីខុសច្បាប់ទាំងតូចទាំងធំ។
ហោ ជិនវីរៈយុទ្ធ ចៅហ្វាយស្រុកអន្លង់វែងបានប្រាប់តាមទូរស័ព្ទនៅម៉ោង៧និង៥នាទីនេះថា លោកមិនដឹងអីទេគេចាប់អ្នកកាសែតនៅស្រុកត្រពាំងប្រាសាទទៅសួរចៅហ្វាយស្រុកត្រពាំងប្រាសាទទៅ បើទោះជាកម្ពុជាសុវណ្ណភូមិព្យាយាមប្រាប់គាត់តាមសម្តីលោកសុផានុរស្សដែលបានប្រាប់កាលពីព្រឹកមិញនេះក៏ដោយ៕ដោយ៖ ផ្លុង-រ៉េត
.jpg)
.jpg)
.jpg)
.png)
.jpg)
.jpg)
