លោក ទូសាភឿត រៀបគម្រោងវាសដីធ្វើប្លង់បើទោះជាបង់លុយអោយម្ចាស់ដីមិនគ្រប់ក៏ដោយ

លោក​ ទូ សាភឿត និងលោក លុយ បញ្ញា ថៅកែក្រុម​ហ៊ុន​បុរីអង្គរលែនម៉ាក្ស​ ដែល​មានទីតាំង​ស្ថិតក្នុងភូមិសណ្តាយ ឃុំខ្នារសណ្តាយ ស្រុក​បន្ទាយស្រី ខេត្តសៀមរាប បាន​រៀបចំគម្រោង​វាស់វែងធ្វើ​ប្លង់ដីដែល​បាន​ទិញ​ពី​​លោកជំទាវឧកញ្ញាបណ្ឌិត​ លី អ៊ុំអេង នៅថ្ងៃទី១៧ ខែកញ្ញា ឆ្នាំ២០២១នេះ បើទោះ​ជាតំណាងក្រុម​ហ៊ុន​ទាំងពីររូបខាងលើ​នេះនៅជំពាក់លុយថ្លៃដីជាងប្រាំលានដុល្លារ​អាមេរិក​ពុំទាន់បង់អស់ក៏ដោយ​ នេះបើយោងតាមប្រសាសន៍របស់លោកជំទាវឧកញ្ញា​បណ្ឌិត លី អ៊ុំអេង តាមតេឡេក្រាម​កាល​ពី​ល្ងាចថ្ងៃទី១៦ ខែកញ្ញា ឆ្នាំ២០២១ម្សិលមិញនេះ។

លោកជំទាវឧកញ្ញាបណ្ឌិត លី អ៊ុំអេង បាន​ប្រាប់កម្ពុជា​សុវណ្ណភូមិថា លោ ទូ សាភឿន និង​លោក លុយ បញ្ញា បាន​ទិញដីរបស់លោកជំទាវចំនួន​ជាងពីររយហិចតា ដែល​មាន​ចំនួន​ទឹក​ប្រាក់​សរុបប្រហែលជាង៧លានដុល្លារអាមេរិក តែលោក ទូ សាភឿត និងលោក លុយ បញ្ញា បាន​បង់​ប្រាក់​ជូន​លោក​ជំទាវ​តែជាង​២លានដុល្លារតែប៉ុណ្ណោះ ហើយនៅជំពាក់ប្រាក់​ជាងប្រាំលានដុល្លារទៀតមិន​ទាន់បាន​បង់។ លោកជំទាវបណ្ឌិតមានប្រសាសន៍បន្តទៀតថា កន្លងទៅលោក ទូ សាភឿត និងលោក លុយ បញ្ញា បាន​ចេញសែកស្អុយ​អត់​មាន​ទឹកប្រាក់​ជូនលោកជំទាវជាច្រើន​សន្លឹក ដែល​ជាហេតុបណ្តាល​អោយមាន​ការ​ប្តឹងផ្តល់គ្នាឡើងតុលាការ។ លោកជំទាវបានបន្ថែមថា លុយ​មិន​ទាន់​បង់គ្រប់ផង បែរជាលោក ទូ សាភឿត និង​លោក លុយ បញ្ញា រៀបគម្រោងអោយ​ខាង​សូរិយោដីខេត្តសៀមរាប​​ទៅ​វាស់​វែងដីធ្វើ​ប្លង់កម្មសិទ្ធនៅថ្ងៃទី១៧ ខែកញ្ញា ឆ្នាំ២០២១នេះ។

លោកជំទាវបណ្ឌិត លី អ៊ុំអេង ស្នើសុំទៅ​ថ្នាក់ដឹក​នាំគ្រប់ជាន់ថ្នាក់មេត្តាជួយរក​យុត្តិធម៌ជូនលោក​ជំទាវផងពាក់ព័ន្ធករណីវិវាទដីធ្លីរវាង​លោកជំទាវ និងលោក​ ទូ សាភឿត និងលោក លុយ បញ្ញាតំ​ណាង​​ក្រុម​ហ៊ុន​បុរីអង្គរលេនម៉ាក្សា​ខាងលើនេះ។

កាសែតកម្ពុជាសុវណ្ណភូមិ មិន​អាច​សុំ​ការពន្យល់ពីលោក ទូ សាភឿត និងលោក លុយ បញ្ញា ថៅកែ​ក្រុម​ហ៊ុន​បុរីអង្គរលែនម៉ាក្សខាងលើ​នេះបាន​ទេ ព្រោះ​គ្មាន​លេខ​ទូរស័ព្ទសម្រាប់ធ្វើ​ការ​ទំនាក់ទំនង តែអង្គភាពកាសែតកម្ពុជាសុវណ្ណភូមិ ​រងចាំរាល់ការ​បំភ្លឺរបស់តំណាង​ក្រុម​ហ៊ុន​បុរីអង្គរលែនម៉ាក្សនេះ​គ្រប់ពេល​វេលា៕ ដោយ៖ ផ្លុង រ៉េត