លោក ជិន ស៊ីថា នាយខណ្ឌរដ្ឋបាលជលផលលមេត្តាចាក់ការលោក ស៊ិន សុភីផង

លោក ជិន ស៊ីថា នាយខណ្ឌរដ្ឋបាលជលផល​ខេត្តកំពង់ធំថ្មី ត្រូវ​បាន​ប្រជាពលរដ្ឋរស់នៅក្នុងឃុំផាត់សណ្ដាយ ស្រុកកំពង់ស្វាយ ស្នើសុំអោយចាត់វិធានការទៅ​លើ​​កូនចៅក្រោម​ឱវាទ ដែលដើរប្រមូលលុយ​ជាថ្នូរមិន​បង្ក្រាបបទល្មើសនេសាទ​នៅរដូរបិតការ​នេសាទត្រី​ ដើម្បីទុក​អោយត្រីពងកូន​បន្តពូជនៅបឹងទន្លេសាបនៃព្រះរាជាណាក្រកម្ពុជា។

ប្រភពពីពលរដ្ឋបានអោយដឹងថា នៅចំណុចកោះតាបរ ចំណុចផ្សោត ចំណុចទ្វារបឹង និងចំណុចកាឡុកបាយក្អែក មានបទល្មើសនេសាជាច្រើន​កន្លែងរាប់មិន​អស់ តែលោក ស៊ិន សុភី នាយសង្កាត់រដ្ឋបាលជលផលឃុំផាត់សណ្តាយ និងលោក ប៉ែន សាវេង នាយរងផ្នែកសង្កាត់រដ្ឋបាលជលផល​ ដែល​ជាអ្នកទទួលខុសត្រូវផ្ទាល់ជាមួយនឹងបទល្មើសនេសាទទាំងអស់នៅចំណុចខាងលើនេះ មិន​បាន​អនុវត្តតាម​គោលការណ៍របស់នាយខណ្ឌ និងតួនាទីរបស់ខ្លួនទេ បែជាបណ្តោយ​អោយ​មាន​បទល្មើសនេសាទកកកុញ ជាថ្នូរជាមួយនឹងទឹកប្រាក់សូកប៉ាន់ក្រោមតុ ដើម្បីចែកគ្នា​ធ្វើ​មាន​ធ្វើបាន​រៀងៗខ្លួន។ ពលរដ្ឋបានបន្តទៀតថា ជារៀងរាល់ឆ្នាំគឺពួកគាត់សង្កេតឃើញថាលោក ប៉ែន សាវេង នាយរងផ្នែករដ្ឋបាលជលផលផាត់សណ្ដាយ និងលោក ស៊ិន សុភី នាយសង្កាត់រដ្ឋបាលជលផល ផាត់សណ្ដាយ តែងតែដើរប្រមូលលុយ ពីបទល្មើសទាំងនេះ មិនដែលខានឆ្នាំណាមួយឡើយ រួចហើយនាំគ្នាវេចលុយ​ដែលប្រមូលបានពីបទល្មើសនេសាទទាំងនេះរត់ឡើងទៅខេត្តកំពង់ធំ ដើម្បីផ្ដល់ឱ្យក្រុមគ្រួសារខ្លួនស៊ីចាយសប្បាយហ៊ឺហា។

ប្រជាពលរដ្ឋសូមសំណូមពរទៅលោក ជិន ស៊ីថា នាយខណ្ឌរដ្ឋបាលជលផលថ្មី ប្រធានបម្ទីរកសិកម្មរុក្ខាប្រមាញ់ និងនេសាទ ជាពិសេស​ឯកឧត្តម សុខ លូ អភិបាលនៃគណៈអភិបាលខេត្តកំពង់ធំ មេត្តាដាក់បទបញ្ជាឲ្យមន្ត្រីជំនាញក្រោមឱវាទចុះបង្ក្រាប់បទល្មើសនៅរដូវបិទនេសាទផងទាន ដែល​មាន​រាយនាម​នៅចំណុច និងទីតាំងខាងលើ។ បទល្មើសទាំងនេះមានដូចជា ការដាក់របាំងសាច់ក្រហម សាច់ខៀវ ក្រឡាញឹកដែល​ត្រូវបាន​ច្បាប់ហាមឃាត់ ធ្វើ​អោយ​​កូនត្រី ចៅត្រី ចៅទូតចៅលូតចៅលាត្រី ក៏រត់ចេញមិនរួចដែរ។ របាំងសាច់ញឹកទាំងនោះ មួយកន្លែងៗប្រវែងចាប់ពី១៥០០ម៉ែត្រ ទៅ២០០០ម៉ែត្រ។

នៅព្រឹកថ្ងៃទី១៨ ខែកញ្ញា ឆ្នាំ២០២១ម្សិលមិញនេះ អ្នកសារព័ត៌មានយើងបានទូរស័ព្ទទៅលោក ស៊ិន សុភី ហៅ(ប្រុស) ដើម្បីសុំការបំភ្លឺពាក់ព័ព្ធនិងករណីខាងលើ តែលោកបានចុចបិតទូរស័ព្ទ មិនលើកទទួល។

ចំណែកឯលោក ជិត ស៊ីថា នាយខណ្ឌរដ្ឋបាលជលផលខេត្តកំពង់ធំថ្មីពុំទាន់អាចសុំការបំភ្លឺបានទេ ព្រោះពុំមានលេខទូរស័ព្ទសម្រាប់ធ្វើការទំនាក់ទំនង៕ ដោយ៖ ផ្លុងរ៉េត