ឃុបឃិតគ្នាជាប្រព័ន្ធ បង្វិលយកដីផ្លូវធ្វើផ្ទះ យកដីត្រូវធ្វើផ្ទះទៅធ្វើផ្លូវវិញ

គ្រួសារលោក ង៉ែត ភារៈ កូនប្រុស​បង្កើត​របស់លោក​ ង៉ែត ងឹម (អតីតអនុភូមិដកពោធិ៍) សង្កាត់ស្លក្រាម ក្រុងសៀមរាប បានទទួល​រងអំពើអយុត្តិធម៌អស់រយៈពេល​ជាយូរឆ្នាំមក​ហើយ​ ពេល​នេះ​កំពុងតែលើកដៃ​សំពះ​​ស្រែកដង្ហើយ​ហៅសុំទៅ​លោក នួន ពុទ្ធារ៉ា អភិបាលគណៈអភិបាល​ក្រុងសៀមរាប និងឯកឧត្តម ទៀ សីហា អភិបាល​គណៈអភិបាលខេត្តសៀមរាប មេត្តា​ជួយផ្តល់យុត្តិធម៌ជូនគ្រួសារ​ពួកគាត់ផង ពាក់ព័ន្ធជាមួយ​ដីមួយកន្លែងស្ថិតនៅក្រោយ​ផ្សារលើធំថ្មី​ដែល​មាន​ទំហំ ៤មx១២ម។

កាលឆ្នាំ១៩៨៤ក្រោយភ្លើងឆេះផ្សារលើរួចមក លោក ឈាវ ថៃ មេភូមិដកពោធិ៍បាន​បែងចែកដីអោយពលរដ្ឋអស់ នៅ​សល់តែដីដែលមានទំហំ(១២មx១២.៥ម) សម្រាប់ធ្វើ​ស្នាក់ការភូមិដកពោធិ៍ដោយខាងកើតទុកជាផ្លូវ។

លុះក្នុងឆ្នាំ១៩៩៤លោក ពឹង ឃៀង បាន​យកដីផ្លូវ​ខាងកើតនេះ សាងសងរោងលក់ថ្នាំពេទ្យ ហើយក៏មានទំនាស់ជាមួយមេភូមិ ព្រោះមេភូមិមិនអនុញ្ញាតិអោយសាងសង់ ហើយបាន​រាយការណ៍ជូនលោក ចៅ សែន អភិបាលស្រុកសៀមរាបនៅថ្ងៃដដែលនោះ។ លោកចៅសែនចុះមក​មើល​ហើយសួរនាំត្រួសៗ​ក៏ត្រឡប់ទៅវិញ។ លុះថ្ងៃស្អែក​លោក ចៅ សែន បាន​បើកអង្គប្រជុំ ពាក់ព័ន្ទរឿងលោក ពឹង ឃៀង សាងសង់រោងលក់​ថ្នាំពេទ្យលើ​ដីផ្លូវខាងលើនេះ ដែលមានអ្នក​ចូលរួមដូចខាងក្រោម៖
          ១.លោក ចៅ សែន អភិបាលស្រុក ជាប្រធាន
          ២.លោក ហ៊ូ ស៊ាប ប្រធានករិយាល័យភូមិបាល​ស្រុក
          ៣.លោក ណុប វណ្ណ ប្រធានយុត្តិធម៌ស្រុក និងជាលេខាកត់ត្រា
          ៤.លោក រស់ ហេង ចៅសង្កាត់លេខ១
          ៥.លោក រស់ សុខ ប្រធានគ្រប់គ្រងផ្សារលើ
          ៦.លោក ឈាវ ថៃ មេភូមិដកពោធិ៍
          ៧.លោក ង៉ែត ងឹម អនុភូមិដកពោធិ៍
          ៨.លោកស្រី គឹម​ អូន ម្ចាស់សំណង់

ក្រោយកិច្ចប្រជុំខាងលើ លោក ចៅ សែន អភិបាលស្រុកសៀមរាប បាន​សម្រេចកាត់ដីដែលមានទំហំ ១២មx១២.៥ម ជាបីចំណែកដូចខាងក្រោម៖

          ១.ដីទំហំ ៤មx១២ម ប្រគល់អោយលោក ឈាវ ថៃ មេភូមិដកពោធិ៍ធ្វើលំនៅដ្ឋាន។
          ២.ដីទំហំ ៤មx១២ម ប្រគល់អោយលោក ង៉ែត ងឹម អនុភូមិដកពោធិ៍ធ្វើលំនៅដ្ឋាន។
          ៣.ដីទំហំ ៤មx១២.៥ម ទុកធ្វើ​ជាផ្លូវ (តែអនុញ្ញាតិអោយលោក ពឹង ឃៀង ធ្វើ​រោងលក់​ថ្នាំ
          ពេទ្យបណ្តោះអាសន្នសិន)។

ក្បាលដីលេខ ៤៣៧ ដែលលោក ង៉ែត ងឹម ទទួលបានស្ថិតក្នុងភូមិដកពោធិ៍ សង្កាត់ស្លក្រាម ក្រុងសៀមរាប មានព្រំប្រទល់ខាងជើងជាប់ទៅនឹងផ្លូវ ខាងត្បូងជាប់នឹងលូទឹកស្អុយ ខាងកើតជាប់នឹងផ្លូវ ខាងលិចជាប់ក្បាលដីលេខ ៦៨០ (ដីលោកឈាវថៃមេភូមិដកពោធិ៍)។

ជាក់ស្តែងនៅពេលបច្ចុប្បន្ននេះលោក ពឹង ឃៀង អ្នក​សង់រោងលក់ថ្នាំពេទ្យលើដីផ្លូវបានកំពុងសាងសង់សំណង់ថ្មយ៉ាងស្គឹមស្គៃលើដីផ្លូវដោយខុសច្បាប់បានដោយរលូន តែអកុសល្យលោក ង៉ែត ភារៈ កូនប្រុសបង្កើតរបស់លោក ង៉ែត ងឹម ដែលមានដីមានប្លង់កម្មសិទ្ធត្រឹមត្រូវ​មិន​អាច​សាង​សង់លំនៅដ្ឋានបាន ព្រោះពួកក្រុម​លោកលន់ និងក្រុមពុករលួយ​នាំគ្នាបង្វិលយក​ដីរបស់គាត់​ធ្វើ​ជាផ្លូវវិញ។

លោក ង៉ែត ភារៈ កូន​ប្រុសរបស់លោក ង៉ែត ងឹម និងម្តាយ​ដែល​មាន​វ័យចំណាស់ បានលើកម្រាម​ដៃដប់សំពះ សុំអង្វរលោក នួន ពុទ្ធារ៉ា អភិបាលគណៈអភិបាលក្រុងសៀមរាប​ និងឯកឧត្តម ទៀ សីហា អភិបាល​គណៈអភិបាល​ខេត្តសៀមរាប មេត្តាស៊ើបអង្កេតពីប្រវត្តដីខាងលើនេះ ដើម្បីផ្តល់ភាពយុត្តិធម៌ជូនពួកគាត់ផង កុំជឿតាម​ការរៀបចំ និងសម្តីរបស់មន្ត្រីគ្រាប់ល្ពៅមួយចំនួន​ដែលកំពុង​តែ​ឃុបឃិតគ្នាជាមួយលោក ពឹង ឃៀង យកដៃបាំងមេឃ អោយសប្រែទៅជាខ្មៅ ខ្លៅក្លាយទៅជាបណ្ឌិត ឯមនុស្សត្រង់ពិតរងទុក្ខវេទនា៕ ដោយ៖ ផ្លុងរ៉េត