លោក ទិត្យណារ៉ុង ស្នងការខេត្តសៀមរាបគ្មានសមត្ថភាពបញ្ឈប់ភ្ញៀវទេសចរណ៍បរទេសជួលម៉ូតូជិះដោយខ្លួនឯង

ភ្ញៀវទេសចរណ៍បរទេស​ដែល​មក​ដើរលេង​កម្សាន្តនៅ​ខេត្តសៀមរាបមួយចំនួន​បាន​ជួល​ម៉ូតូជិះ​ដើរ​លេងក្នុង​ក្រុងសៀមរាប និង​ជិះ​ទៅ​មើ​ល​ប្រាង្គប្រាសាទ​បុរាណ​នានាយ៉ាង​គគ្រឹគគគ្រេង ដោយ​គ្មាន​សមត្ថកិច្ច​ពាក់ព័ន្ធណា​ចាត់វិធានការ​តាម​ផ្លូវ​ច្បាប់នៃ​ព្រះរាជាណាចក្រ​កម្ពុជាទាល់តែសោះ។

លោក ជឹមសុវណ្ណ នាយការិយាល័យ​ចរាចរណ៍ផ្លូវ​គោគនៃ​ស្នងការនគរបាល​ខេត្តសៀមរាប ធ្លាប់​បាន​ប្រាប់កាសែតកម្ពុជាសុវណ្ណភូមិថា យោងតាម​ច្បាប់​ចរាចរណ៍​ផ្លូវ​គោគ​នៃ​ព្រះ​រា​ជា​ណា​ចក្រ​កម្ពុជា​​មិន​អនុញ្ញាតិអោយភ្ញៀវ​ទេសចរណ៍បរទេស​ដែលមក​កម្សាន្តនៅ​ព្រះរាជាណាចក្រកម្ពុជា ជួល​យានយន្តគ្រប់​ប្រភេទបើក​បរដោយ​ខ្លួនឯងនោះទេ។ លោក ជឹមសុវណ្ណ បន្តថា មាន​ករណី​លើក​​លែង​ចំ​ពោះបុគ្គលិកជាជនបរទេសនៃ​អង្គការជាដៃគូរដ្ឋាភិបាល ឬអង្គការក្រៅរដ្ឋាភិបាល អាច​បើក​បរដោយ​ខ្លួនឯងបាន ប៉ុន្តែត្រូវ​មាន​ប័ណបើកបរជាលក្ខណះអន្តរជាតិ​ ដែល​មាន​សុព​ល​ភាព​​ត្រឹមត្រូវ។

នៅរសៀលថ្ងៃទី១៥ខែគុម្ភៈ ឆ្នាំ២០១៩នេះ លោក ជឹមសុវណ្ណ បាន​ប្រាប់​តាមទូរស័ព្ទទៀតថា ភ្ញៀវ​​បរទេសដែលជួល​ម៉ូតូទាំងនោះ អោយ​តែជួប​លោក​ គឺលោក​តែង​តែចាប់​អោយ​ធ្វើកិច្ចសន្យា តែ​ម្ចាស់អ្នក​ជួលម៉ូតូនៅតែ​លួច​ជួលមិន​ចេះរាងចាល។ លោក ជឹមសុវណ្ណ បានបន្ថែមថា លោក​និង​លើក​ករណីនេះនៅក្នុង​អង្គប្រជុំ ដើម្បីរាយការណ៍ជូនថ្នាក់លើ។

យោងតាម​ការ​ឃើញផ្ទាល់ភ្នែកជាក់ស្តែងជា​រៀង​រាល់ថ្ងៃ​ពីក្រុម​អ្នក​រត់​រឺម៉ក រត់តាក់ស៊ី និង​ពលរដ្ឋ​នៅ​ក្នុង​ខេត្ត​សៀម​រាប បាន​អោយដឹងថា ភ្ញៀវ​ទេសចរណ៍​បរទេស នៅតែជួលម៉ូតូជិះយ៉ាង​អាណា​ធិបតេយ្យជារៀងរាល់ដោយ​គ្មានការ​រំខាន​ពីសមត្ថកិច្ច​ណាទាំងអស់។

មតិពលរដ្ឋ​ម្នាក់បាន​លើកឡើងថា បើខាង​សមត្ថកិច្ច​ពាន់ព័ន្ធ ជាពិសេសខាងប៉ូលីសចរាចរណ៍ មាន​ចេតនាហាមឃាត់​ភ្ញៀវ​បរទេសមិន​អោយ​បើកបរដោយខ្លួន​ឯង​មែន​នោះ វាមិន​លំបានទេ​​ គ្រាន់​​តែ​សហការជាមួយ​ខាង​អ្នក​ឆែកសំបុត្រ​គ្រប់​ច្រកចេញចូលគឺ​អាច​ទប់​ស្កាត់បាន​បាត់​ទៅ​ហើយ ព្រោះម៉ូតូដែលភ្ញៀវ​ជួលទំាងនោះ​គ្មានស្លាប់​ហោះនោះទេ។

សូមរំលឹកផងដែថា សម្តេច​នាយករដ្ឋ​មន្ត្រី ហ៊ុនសែន ក៏ធ្លាប់​បាន​ប្រកាស​តាម​ទូរ​ទស្សន៍​ក្តែងៗ​ផង​ដែរ មិន​អោយ​ភ្ញៀវ​បរទេស​ជួលយានយន្តបើកបរដោយខ្លួនឯងទេ បន្ទាប់​បរទេស​បើក​បរ​បង្ករ​គ្រោះ​ថ្នាក់ចរាចណ៍​ផ្ទួនៗកាលពីឆ្នាំ២០១៨កន្លងទៅ។

រីឯកាលពីឯកឧត្តម ឃឹមប៊ុនសុង នៅជាអភិបាលខេត្តសៀមរាប​ លោកក៏ធ្លាប់បាន​ចេញ​សេច​ក្តី​ជូន​ដំ​ណឹង (ស.ជ.ណ) ហាម​ដាច់ខាតមិន​អោយ​ភ្ញៀវ​បរ​ទេស​ជួល​យាន​យន្ត​បើក​បរ​ដោយ​ខ្លួនឯង​នោះទេ តែស្ងាត់បានប្រហែលមួយសប្តាហ៍ ស្រាប់​តែ​ជួលព្រោង​ព្រាតដដែលរហូត​មក​ដល់រាល់​ថ្ងៃនេះ។

ពលរដ្ឋ​នៅខេត្តសៀមរាប ចោទសួរទៅ ឯកឧត្តម ទិត្យ ណារ៉ុង ស្នងការ​ខេត្តសៀមរាបថា តើ​ឯក​ឧត្តម​​មាន​ដែលបាន​គិតគូពីបញ្ហាភ្ញៀវ​ទេសចរណ៍បរទេស​ជួន​ម៉ូតូបើក​បរដោយ​ខ្លួន​ឯងដែរឬទេ? ឬមួយ​ឯកឧត្តមក៏មានភាគហ៊ុនក្នុង​មុខ​ជំនួញជួល​ម៉ូតូអោយ​ភ្ញៀវ​បរទេសនេះដែរ បាន​ជាមិន​ព្រម​បញ្ចប់ករណីនេះ?

សូមបញ្ជាក់ថា ការ​ជួលម៉ូតូអោយ​ភ្ញៀវ​បរទេស គឺបង្ករអោយ​មាន​គ្រោះថ្នាក់​ចរាចរណ៍ ស្ទើរ​ជា​រៀង​​រាល់ថ្ងៃ ហើយ​ម្យ៉ាង​វិញទៀត​វាមិន​ស្រប​ទៅនិង​ផ្លូវ​ច្បាប់ទៀតផង៕ ដោយ៖ផ្លុងរ៉េត