បើក​យុទ្ធនាការ​៤​ថ្ងៃ​ រកឃើញ​ឈើ ​១២១​ម៉ែត្រគូប ​រណាយន្ត៧ គ្រឿង​ក្នុង​តំបន់​ព្រៃឡង់​

លទ្ធផលនៃយុទ្ធនាការទ្រង់ទ្រាយធំរបស់បណ្ដាញព្រៃឡង់រយៈពេល៤ថ្ងៃ ដែលទើបបញ្ចប់កាលពីថ្ងៃទី១៧កញ្ញាថ្មីៗនេះបានរកឃើញគំនរឈើ ខុសច្បាប់ដែលជនល្មើសបានដាក់រប៉ាត់រប៉ាយចំនួន ១២១ម៉ែត្រគូប និង រណាយន្តចំនួន៧គ្រឿងក្នុង តំបន់ព្រៃឡង់ ។

បណ្ដាញព្រៃឡង់បានលើកឡើងនៅក្នុងសេចក្ដីប្រកាសព័ត៌មានមួយ របស់ខ្លួន នារសៀលថ្ងៃទី១៩ កញ្ញា នេះថា ប្រជាសហគមន៍ព្រៃឡង់បានរកឃើញបទល្មើស ជា ច្រើនកន្លែង , ប៉ុន្តែពួកគាត់មិនអាចដើរគ្រប់ចំណុចបទល្មើសបា ន ដោយសារបញ្ហាមធ្យោបាយធ្វើដំណើរ ។

សម្រាប់បណ្ដាញព្រៃឡង់នេះជាជោគជ័យថ្មីមួយទៀត ក្នុងការបង្ការទប់ស្កាត់បទល្មើសកាប់បំផ្លាញព្រៃឈើក្នុង តំបន់ព្រៃឡង់ ដែលមានពលរដ្ឋភាគច្រើនជាជនជាតិភាគតិចប្រមាណជាង៦ម៉ឺនគ្រួសារពឹង អាស្រ័យជីវភាព។ប៉ុន្តែទន្ទឹមគ្នាក៏មានបញ្ហារំខានខ្លះៗដែរ បណ្ដាលមកពីភ្ហៀងធ្លាក់ខ្លាំង និងជនខិលខូចរាយដែកគោលធ្វើឲ្យមុតកង់ម៉ូតូនៅត្រង់តំបន់ ជាំវិល ក្នុងខេត្ត កំពង់ធំ ។

គួរបញ្ជាក់ថា រយៈពេល៤ថ្ងៃ (១៤កញ្ញា-១៧កញ្ញា) បណ្ដាញព្រៃឡង់មកពីខេត្តចំនួន៤គឺ ខេត្តព្រះវិហារ កំពង់ធំ ស្ទឹងត្រែង និង ក្រចេះ ចំនួន៥០០នាក់ជាមួយម៉ូតូចំនួន៣០០គ្រឿង បានបើករុលចូទៅក្នុងតំបន់ព្រៃឡង់ ក្នុងគោលដៅបង្រ្កាបនិងទប់ស្កាត់បទល្មើសព្រៃឈើ ។ប៉ុន្តែយ៉ាងណាក៏ដោយឈើដែលពួកគេប្រមូលបានក្នុងយុទ្ធនាការលើក នេះ គ្រាន់តែជាឈើកំប៉េកកំប៉ុកដែលជនល្មើសកាប់ គររាត់រាយក្នុងព្រៃតែប៉ុណ្ណោះ ដែលគេជឿថា នឹងមានបទល្មើសធំធេងជាងនេះដែលបង្កដោយក្រុមហ៊ុនដែលទទួល បានសិទ្ធិពីរដ្ឋ ៕