មូហ្គាបេ ថ្កោលទោស ក្រុមប្រឹក្សាសន្តិសុខ លើការ ស្រេកឃ្លានសង្គ្រាម

យូអិន៖ លោកប្រធានាធិបតី ស៊ីមបាបវេ រ៉ូប៊ឺត មូហ្គាបេ នៅថ្ងៃពុធ ទី២៦ ខែកញ្ញា ឆ្នាំ២០១២ បានចោទប្រកាន់ទៅលើ ក្រុមប្រឹក្សាសន្តិសុខនៃ អង្គការសហប្រជាជាតិ ថាបានពង្រីកនូវភាព ស្រេកឃ្លានសង្គ្រាមរបស់ខ្លួន ជាពិសេសនោះគឺលោកសូម ថ្កោលទោសទៅលើប្រតិបត្តិការ របស់អង្គការណាតូ ដើម្បីជួយដល់ការតាមប្រម៉ាញ់ និងសម្លាប់មេដឹកនាំលីប៊ី ម៉ូអាម៉ា ហ្គាដាហ្វី កាលពីឆ្នាំ២០១១ កន្លងទៅនេះ។

មេដឹកនាំ ស៊ីមបាបវេ ដែលមានវ័យ ៨៨ឆ្នាំរូបនេះបានប្រាប់កិច្ចប្រជុំ នៃមហាសន្និបាតអង្គការសហប្រជាជាតិថា យុទ្ធនាការរបស់កងកម្លាំង អង្គការណាតូ នៅប្រទេសលីប៊ី បានបង្ហាញឲ្យគ្រប់គ្នាមើលឃើញថា ប្រទេសសម្ព័ន្ធមិត្តរបស់ពួកគេទាំងអស់ បានប្រកាន់នូវឬកពារអួតក្អេងក្អាងថា ពួកគេទាំងអស់នោះមាន អំណាចខ្លាំងចំពោះពួកយើងនៅអាហ្វ្រិក។ ជាងនេះទៅទៀត លោកបានបន្ថែមថា បេសកកម្មស្វែងរកសន្តិភាព នៅប្រទេសលីប៊ី ក៏ត្រូវបានបដិសេធ ហើយជាប់គាំងផងដែរ ក្នុងពេលកន្លងមក។

គួរបញ្ជាក់ផងដែរថា កាលពីឆ្នាំ ២០១១ កន្លងទៅនេះបន្ទាប់ពីការ ផ្ទុះឡើងប្រឆាំងមេដឹកនាំ ប្រទេសលីប៊ី ដែលបានកាន់អំណាចផ្តាច់ ការណ៍រយៈពេលជាង ៤០ឆ្នាំនោះ ក្រុមប្រឹក្សាសន្តិ សុខបានសម្រេចចេញនូវ ដំណោះស្រាយចំនួនពីរ ដោយបង្កើតតំបន់គ្មានការហោះហើរ និង អនុញ្ញាតដល់ប្រតិបត្តិការ តាមផ្លូវអាកាស របស់អង្គការណាតូនៅ ក្នុងប្រទេសលីប៊ី។ រដ្ឋាភិបាលលីប៊ីថ្មី បានសហការណ៍ជាមួយនឹង ប្រទេសលោកខាងលិច ក្នុងយុទ្ធនាការខាងលើនេះ ប៉ុន្តែចិន និង រុស្ស៊ី បានបង្ហាញភាពស្ទាក់ស្ទើរ ដោយមិនចូលរួមឡើយ៕