អាមេរីកថា ការវាយប្រហារនៅលីប៊ី ជាប់ទាក់ទងនឹង អាល់កៃដា

ទីភ្នាក់ងារស៊ើបអង្កេត អាមេរិក បាននិយាយនៅថ្ងៃសៅរ៍ ទី២៩ ខែកញ្ញា ឆ្នាំ ២០១២ នេះថា ការ វាយប្រហារដែលបានសម្លាប់ មន្ត្រីទូតអាមេរិកបួនរូបនៅប្រទេសលីប៊ី កាលពីពេលថ្មីៗនេះ គឺជាការរៀបចំ ផែន ការទុកជាមុន មួយ ហើយវាក៏មានជាប់ពាក់ព័ន្ធនឹង ក្រុមបង្កភេរវកម្មអាល់កៃដាផងដែរ ស្របពេល សំនួរដែល មិនអាចឆ្លើយបានមួយចំនួន នៅ តែបន្តមាន នៅឡើយនោះ។

នៅក្នុងសេចក្តីថ្លែងការណ៍ របស់ទីភ្នាក់ងារជាតិស៊ើបអង្កេតអាមេរិក អ្នកនាំពាក្យស្ថាប័ននេះ គឺលោក សន ធឺណឺ បានបញ្ជាក់ទៀតថា វានៅ តែមិនទាន់មានភាពច្បាស់លាស់នៅឡើយ ថាមានក្រុម ឬមួយក៏ជនណាមួយ ដែល បានរៀបចំ និង គ្រប់គ្រងលើការវាយប្រហារនៅលីប៊ី នោះ ហើយយើងក៏មិនច្បាស់ដែរថាតើមេក្រុមបង្ក ទាំងអស់ ខាងលើនេះ បានបញ្ជូនកូនចៅ របស់ពួកគេមកដោយផ្ទាល់ដែរ ឬ មួយក៏យ៉ាងណា នោះ។

ក្រោយពីការស៊ើបអង្កេតក្នុងរយៈពេលជាង ២សប្តាហ៍កន្លងទៅនេះ ស្ថាប័នស៊ើបអង្កេត អាមេរិក បានសន្និដ្ឋាន ថា ក្រុមខាងលើនេះអាចជាក្រុមដែលមានការស្និតស្នាល ឬ មួយក៏ជា សម្ព័ន្ធរបស់បណ្តាញភេរវកម្មពិភពលោក អាល់កៃដា ក៏ថាបាន។

ឆ្លើយតបចំពោះការវាយ ប្រហារស្ថានកុងស៊ុល អាមេរិក នៅទីក្រុងប៊េងហ្គាស៊ី ប្រទេស លីប៊ី កាលពីថ្ងៃទី១១ ខែកញ្ញា កន្លងទៅនេះ លោកប្រធានាធិបតីអាមេរិក បារ៉ាក់ អូបាម៉ា ក៏បានធ្វើការពន្យល់ អំពីមូលហេតុ យ៉ាងច្រើនដល់សាធារណជន ដើម្បីទប់ទល់ទៅនឹងការរិះគន់យ៉ាងខ្លាំងៗពីគណបក្ស សាធារណរដ្ឋ ដែលកំពុងតែព្យាយាមដណ្តើមយកសន្លឹកឆ្នោតនោះផងដែរ។

គួរបញ្ជាក់ថា លោកអគ្គរដ្ឋទូតអាមេរិក គ្រីស្តូហ្វឺ ស្ទេហ្វិន និង បុគ្គលិកទូតអាមេរិក ៣ រូបទៀត បានស្លាប់នៅក្នុង ការវាយប្រហារនៅឯស្ថានកុងស៊ុលអាមេរិក នៅទីក្រុងប៊េងហ្គាស៊ី ដោយសារ តែមានផ្ទុះឡើងនូវកំហឹងរបស់ អ្នកកាន់សាសនាឥស្លាម ទៅលើខ្សែវីដេអូ ដែលប្រមាថមាក់ងាយយ៉ាងធ្ងន់ធ្ងរដល់ព្យាការីមហាមេដ របស់សាសនា នេះ៕