ស៊ីរី ត្រៀមខ្លួនវាយបក បើកងទ័ពអាម៉េរិក និងសម្ព័ន្ធមិត្តវាយប្រហារ

រដ្ឋាភិបាលស៊ីរី ប្រកាសត្រៀមខ្លួន វាយបក ប្រសិនបើសហរដ្ឋអាម៉េរិក និង លោកខាងលិចបើឆាកវាយប្រហារ ដោយកម្លាំងយោធា ខណៈដែល មានព័ត៌មាន លេចឮ ថា ប្រធានាធិបតី អាម៉េរិក អូបាម៉ា កំពុងពិចារណាប្រហារ វាយលើស៊ីរី។

យោងតាមសារព័ត៌មាន AP នៅថ្ងៃ ពុធ ទី ២៨ ខែ សីហា ឆ្នាំ ២០១៣ នេះបានឲ្យដឹងថា លោក វ៉ាលីត្រ ម៉ូអាល់លេម រដ្ឋមន្រ្តីក្រសួងការបរទេសស៊ីរី បានចេញសេចក្តីថ្លែងការណ៍ថា រដ្ឋាភិបាលស៊ីរី នឹងមានវិធានការការពារខ្លួនឯង ពីការវាយប្រហារផេ្សងៗ មានពីរ ជម្រើស៖ ទី១ យល់ព្រមចុះចូល ឬ ការពារខ្លួនឯងដោយវិធីសាស្រ្តផ្សេងៗ តាមកាលៈទេសៈ និង ទី២ ស៊ីរី មានសមត្ថភាពគ្រប់គ្រាន់ ដែលអាចធ្វើឲ្យពិភពលោកទាំងមូល មានការភ្ញាក់ផ្អើល រួមទាំងធ្វើការព្រមានចំពោះការប្រើកម្លាំងយោធា មកលើស៊ីរី ដែលជាឈ្នាន់របស់អ៊ីស្រាអ៊ែល និង អាល់កៃដា។

ការចេញថ្លែងការណ៍របស់រដ្ឋមន្រ្តីក្រសួងបរទេសស៊ីរី បានធ្វើឡើងបន្ទាប់ពី សហរដ្ឋអាម៉េរិក និង ប្រទេសសម្ព័ន្ធមិត្តជួបពិភាក្សាគ្នា ដើម្បីកំណត់វិធានការ ប្រើកម្លាំងយោធា មកលើស៊ីរី ក្នុងន័យផ្តួលរំលំ របបដឹកនាំផ្តាច់ការរបស់ លោក អាហ្សាត។

ចំណែកសារព័ត៌មាន វ៉ាស៊ីនតោន ប៉ុស្តិ៍ បានដកស្រង់សម្តីមន្ត្រីជាន់ខ្ពស់អាម៉េរិក ថា ប្រធានាធិបតីអាម៉េរិក បារ៉ាក់ អូបាម៉ា កំពុងពិចារណា ប្រើកម្លាំង យោធាវាយប្រហារលើស៊ីរី បែប កំណត់គោលដៅ ដើម្បីទប់ស្កាត់កុំឲ្យក្លាយជាសង្គ្រាមអូសបន្លាយ ដោយប្រើប្រាស់រយៈពេលតែ មិនលើសពី ២ ថ្ងៃនោះឡើយ។សម្រាប់យុទ្ធសាស្រ្តវាយប្រហារ អាម៉េរិក បាញ់គ្រាប់រ៉ុក្កែត ចេញពីនាវាចម្បាំង ដែលបច្ចុប្បន្ន នាវាមួយនេះ កំពុងប្រចាំនៅសមុទ្រ ម៉េឌីទែរ៉ាណេ ឬ យុទ្ធសាស្រ្តមួយទៀត វាយប្រហារដោយប្រើយន្តហោះទម្លាក់គ្រាប់បែករយៈចម្ងាយឆ្ងាយ លើគោលដៅយោធា ដែលជៀសវាងឃ្លាំងអាវុធគីមី របស់ស៊ីរី ដើម្បីទប់ស្កាត់ការភាយសាយ សារធាតុគីមី ៕