បង្រ្កាបទីតាំងកាសីុណូអត់ច្បាប់ធំមួយ នៅក្នុងបុរីប្រិមប្រិយ

លោកឧត្តមសេនីយ៍ទោ សត ណាឌី ដឹកនាំកំលាំងសមត្ថកិច្ច ចុះបង្រ្កាបទីតាំងកាសីុណូអត់ច្បាប់ធំមួយ នៅក្នុងបុរីប្រិមប្រិយ នៅយប់ថ្ងៃទី ២៨ ខែកុម្ភះ ឆ្នាំ២០១៦ ក្រោមការដឹកនាំផ្ទាល់ពី ឧត្តមសេនីយ៍ទោ សត ណាឌី កំលាំងសមត្ថកិច្ចជាច្រើននាក់ បានចុះទៅបង្រ្កាបទីតាំងកាសុីណូ អត់ច្បាប់មួយកន្លែង ទើបនឹងបើកដំណើរការថ្មីៗ ស្ថិតនៅបុរីប្រិមប្រិយ សង្កាត់គោកចក ក្រុងសៀមរាប។

ក្នុងការចុះបង្រ្កាបនេះ លោកឧត្តមសេនីយ៍ត្រី អ៊ុំ អមរ៉ា ស្នងការរងនគរបាល និងជាប្រធានការិយាល័យកណ្តាលប្រឆាំងបទល្មើសខេត្តសៀមរាប បានអោយដឹងថា ការចុះបង្រ្កាបនេះ កំលាំងសមត្ថកិច្ចបានឃាត់ខ្លួនមនុស្ស ១៤នាក់ មានស្រី ៥នាក់ រួមទាំងមេការម្នាក់ ព្រមទាំងឧបករណ៍សំរាប់លេងល្បែងសីុសងផងដែរ។ លោកស្នងការរងបាន បន្តទៀតថា នេះជាកន្លែងបើកល្បែងសីុសងដ៏ធំមួយ ដែលយើងអាចហៅថាជា កាសីុណូ អត់ច្បាប់មួយ ដែលវាយបញ្ជូលគ្នានូវផ្ទះល្វែងរហូតដល់ទៅ ៥ល្វែង។

ទីតាំងល្បែងសីុសងមួយនេះ ក្រោយពីបានទទួលពត៌មានពីជំនាញរួចមក លោកឧត្តមសេនីយ៍ទោ សត ណាឌី បានបញ្ជាកំលាំងចុះសើុបអង្កេត និងតាមដានស្រាវជ្រាវ ហើយពេលដឹងថាមានភស្តុតាងច្បាស់លាស់ហើយ ទើបធ្វើការចុះបង្រ្កាបតែម្តង។