វិនាសកម្មព្រៃលិចទឹកបឹងពារាំងដោយជនទុច្ចរិត

ព្រៃលិចទឹកជម្រកត្រីពងកូននៅរដូវវស្សា ជម្រកសត្វស្លាប និងជីវ:ចម្រុះគ្រប់ប្រភេទ នៅតំបន់អភិរក្សបឹងពារាំង ស្ថិតក្នុងសង្កាត់សៀមរាប និងសង្កាត់ជ្រាវ ក្រុងសៀមរាប ត្រូវបានភ្លើងឆាបឆេះយ៉ាងសន្ធោសន្ធៅ តាំងតែពីថ្ងៃទី១៣ ខែឧសភា រហូតដល់ថ្ងៃទី១៩ ខែឧសភា ឆ្នាំ២០២១ អស់ប្រហែល៥៥ហិចតា។

ឡានទឹកពន្លត់អគ្គីភ័យជាច្រើនគ្រឿង របស់ស្នងការនគរបាលខេត្តសៀមរាប របស់កងរាជអាវុធហត្ថខេត្តសៀមរាប របស់អាជ្ញាធរអប្សរា និងគ្រឿងចក្ររបស់ឯកឧត្តមសៀងណាំ បានសហការគ្នាដើម្បីពន្លត់អគ្គីភ័យខាងលើនេះ។

បើទោះជាមានឡានពន្លត់អគ្គីភ័យដ៏ច្រើនសន្ធឹកសន្ធាប់នេះក៏ដោយ ក៏ពុំអាចពន្លត់ភ្លើងឆេះព្រៃនេះបានមួយរយភាគរយដែរ អាចគ្រប់គ្រងស្ថានការណ៍បានត្រឹមតែ៨០ភាគរយតែប៉ុណ្ណោះ ព្រោះភ្លើងឆេះងំនៅក្នុងដីល្បាប់ខាងក្រោម ម្យ៉ាងវិញទៀតឆេះជាច្រើនកន្លែងក្នុងពេលតែមួយ ហើយព្រៃស្តុកគ្មានផ្លូវសម្រាប់ឱ្យឡានពន្លត់អគ្គីភ័យចូល ដែលជាហេតុធ្វើឲ្យមានការលំបាកយ៉ាងខ្លាំង សម្រាប់ក្រុមពន្លត់អគ្គីភ័យខាងលើនេះ។

តែក៏ជាកុសលផលបុណ្យ នៅយប់ថ្ងៃទី១៨ មានភ្លៀងធ្លាក់មួយមេតូច និងយប់ថ្ងៃទី១៩ ភ្លៀងបានធ្លាក់មួយមេធំទៀត ធ្វើអោយភ្លើងឆេះព្រៃ រលត់មួយរយភាគរយ។

លោក ក្អោបរ៉ន ចៅសង្កាត់ជ្រាវបានប្រាប់កាសែតកម្ពុជាសុវណ្ណភូមិកាលពីថ្ងៃទី១៨ ម្សិលមិញថា ភ្លើងឆេះព្រៃនេះគឺបណ្ដាលមកពីមានអ្នកកាប់រុករានទន្ទ្រានយកព្រៃលិចទឹក ហើយបានដុតរាលឆេះមកពីខាងសង្កាត់សៀមរាបមុន។ លោកក្អោបរ៉នបានបន្តថា មុខសញ្ញាអ្នកឈូសឆាយនិងដុតព្រៃលិចទឹកខាងលើនេះ ខាងសមត្ថកិច្ចបានកំណត់អត្តសញ្ញាណរួចហើយ លោកមានសង្ឃឹម៨៥ភាគរយ ថានឹងអាចចាប់ជនល្មើសបាន។

លោក ទាគឹមសុទ្ធ ប្រធានមន្ទីរកសិកម្មរុក្ខាប្រមាញ់និងនេសាទ បានមានប្រសាសន៍កាលពីថ្ងៃទី១៨ ខែឧសភាឆ្នាំ២០២១ម្សិលមិញថា បារីបើគ្មានអ្នកដុតវាក៏មិនឆេះដែរ។

លោក នួនពុទ្ធារ៉ា អភិបាលគណអភិបាលក្រុងសៀមរាប និងឯកឧត្តម ទៀសីហា អភិបាលគណៈអភិបាលខេត្តសៀមរាប បានចុះផ្ទាល់ដល់កន្លែងឆេះព្រៃ កាលពីយប់ថ្ងៃទី១៨។ លោកអភិបាលក្រុងនិងឯកឧត្តមអភិបាលខេត្ត កំពុងតែយកចិត្តទុកដាក់យ៉ាងខ្លាំង ក្នុងករណីភ្លើងឆេះព្រៃខាងលើនេះ។

ពលរដ្ឋក្នុងខេត្តសៀមរាប សង្ឃឹមថា សមត្ថកិច្ចពាក់ព័ន្ធនិងមន្ត្រីជំនាញ អាចវែកមុខជនល្មើស យកមកផ្តន្ទាទោសតាមផ្លូវច្បាប់ ដើម្បីកុំឲ្យបុគ្គលដទៃទៀត ធ្វើត្រាប់តាម៕ ដោយ: ផ្លុងរ៉េត