គណបក្សហ្វុនស៊ិនប៉ិចបើកវគ្គបណ្តុះបណ្តាលដល់វជនយុវនារី

ក្រោមការដឹកនាំរបស់ ព្រះអង្គម្ចាស់ នរោត្តម​ ចក្រាវុធ ព្រះប្រធានគណបក្សហ្វុនស៊ិនប៉ិច និងក្រោមអធិបតីភាពរបស់ឯកឧត្តម អាំង សំបូ អគ្គលេខាធិការដ្ឋានគណបក្សហ្វុនស៊ិនប៉ិច ដោយមានការរៀបចំពីឯកឧត្តម លើម សុធាវី ប្រធានក្រុមការងារខេត្ត និងឯកឧត្តម សន សាត អគ្គលេខាធិការរងនិងជាធានប្រតិបត្តិខេត្តសៀមរាប ព្រមទាំងមានការចូលរួមពីថ្នាក់ដឹកនាំមួយចំនួនទៀត នៅស្នាក់ការកណ្តាលគណបក្សហ្វុនស៊ិនប៉ិច ខេត្តសៀមរាប បានបើកវគ្គបណ្តុះបណ្តាលមួយថ្ងៃជូនដល់យុវជនយុវនារីដែលស្រលាញ់ និងគាំទ្រគណបក្សហ្វុនស៊ិនប៉ិច កាលពីថ្ងៃទី៣០ ខែកញ្ញា ឆ្នាំ២០២២ម្សិលមិញនេះ។

ឯកឧត្តម អាំង សំបូ អគ្គលេខាធិការដ្ឋានគណបក្សហ្វុនស៊ិនប៉ិច បានមានប្រសាសន៍ដ៏ខ្ពង់ខ្ពស់ថា វគ្គបណ្តុះបណ្តាលនេះគឺបង្កើតឡើងជាលើកដំបូងនៅខេត្តសៀមរាប ហើយក៏នឹងបើកវគ្គបណ្តុះបណ្តាលជាបន្តបន្ទាប់ទៅទៀតក្នុងគោលបំណងបង្កើនចំណេះដឹង និងបង្កើនសមត្ថភាពដល់ យុវជន យុវនារី ជំនាន់ក្រោយឱ្យមានការយល់ដឹងអំពីគោលនយោបាយរបស់បក្ស និងយល់ដឹងអំពីការធ្វើនយោបាយទូទៅនៅកម្ពុជា។ ឯកឧត្តមបានមានប្រសាសន៍បន្ថែមថា គ្រូបង្គោលក្នុងវគ្គបណ្តុះបណ្តាលនេះ គឺបានឆ្លងកាត់ការ​សិក្សានៅឯបរទេសគឺនៅ សាធារណរដ្ឋប្រជាមានិតចិន ដែលជាប្រទេសមួយធ្លាប់ជួយបណ្តុះបណ្តាល​ ការសិក្សាដល់សិក្ខាកាមជាច្រើន ដែលបានបញ្ជូនទៅពីគណបក្សហ្វុនស៊ិនប៉ិច ហើយក៏នៅតែបញ្ជូនសិក្ខាកាម​ឱ្យទៅសិក្សានៅសាធារណរដ្ឋប្រជាមានិតចិននេះ​ជាបន្តបន្ទាប់ទៀត។ ឯកឧត្តមបានពន្យល់ដល់យុវជន​យុវនារី ក្នុងវគ្គបណ្តុះបណ្តាលនេះថា ការតាមដាននយោបាយ ការធ្វើនយោបាយ វាមិនមានទោស ឬមានកំហុសឆ្គងអ្វីនោះទេ ផ្ទុយទៅវិញវាធ្វើឱ្យកូនខ្មែរគ្រប់រូបបានយល់ដឹងអំពីអ្វីដែលហៅថា នយោបាយ អ្វីដែលហៅថាការចូលរួមធ្វើនយោបាយ និងការធ្វើនយោបាយ ម្យ៉ាងវិញទៀតវាធ្វើ​ឱ្យ​យុវជនយុវនារី ចេះស្រលាញ់ជាតិមាតុភូមិ។ ឯកឧត្តមបានបញ្ជាក់បន្ថែមថា មានតែគណបក្សហ្វុនស៊ិនប៉ិចទេ ដែលមានសាច់សាលោហិតរបស់អង្គព្រះមហាក្សត្រធ្វើជាប្រធានបក្ស ក្រៅពីនោះគ្មានទេ សូមកុំយល់ច្រឡំ។ ឯកឧត្តមបានមានប្រសាសន៍ទៀតថា គ្រប់វគ្គបណ្តុះ​បណ្តាលគឺមានចែកជូនវិញ្ញាបនប័ត្រ បញ្ជាក់ការសិក្សាជូនដល់សិក្ខាកាមទាំងអស់ដែលបានចូលរួម។

បន្ទាប់ពីបញ្ចប់វគ្គបណ្តុះបណ្តាលខាងលើនេះ ទាំងគណអធិបតី គ្រូបង្គោល យុវជនយុវនារី ដែលជាសិក្ខាកាមទំាងអស់បានទទួលទានអាហារថ្ងៃត្រង់ជាមួយគ្នាក្រោមទឹកមុខញញឹមញញែម សប្បាយរីករាយ ដូចក្រុមគ្រួសារតែមួយ ហើយសិក្ខាកាមដែលជាយុវជនយុវនារីខាងលើនេះ បានសន្យាថា នឹងយកចំណេះដឹងដែលខ្លួនបានសិក្សាក្នុងវគ្គបណ្តុះបណ្តាលនេះទៅចែករំលែកបន្តដល់យុវជនយុវនារីផ្សេងៗទៀតដែល​មិន​បានចូលរួម៕ ដោយ៖ ផ្លុងរ៉េត