ឯកឧត្តម សោម រតនា លើកទឹកចិត្តដល់អ្នកសារព័ត៌មានក្នុងការជួយផ្សព្វផ្សាយព្រឹត្តិការណ៍អង្គរសង្ក្រានឆ្នាំ២០២៣ខាងមុខនេះ

នៅក្នុងសិក្ខាសាលាផ្សព្វផ្សាយ និងជំរុញយន្តការផ្សព្វផ្សាយអំពីព្រឹត្តិការណ៍អង្គរសង្រ្កាន្ត ឆ្នាំ២០២៣ នាព្រឹកថ្ងៃទី២២ ខែកុម្ភៈ ឆ្នាំ២០២៣ នៅសណ្ឋាគាររីជេនស៊ីអង្គរ ខេត្តសៀមរាប ក្រោមអធិបតីភាព ឯកឧត្តមបណ្ឌិត សោម រតនា សមាជិកគណៈកម្មាធិការកណ្តាលសហភាពសហព័ន្ធយុវជនកម្ពុជា បានមានប្រសាសន៍ថា ”ប្រព័ន្ធផ្សព្វផ្សាយព័ត៌មាន និង បណ្តាញសង្គមនានា មានសារសំខាន់ណាស់ក្នុងការជួយផ្តល់ព័ត៌មានឱ្យសាធារណជនបានស្គាល់ បានដឹងអំពីកម្មវិធីនានា ក៏ដូចជាស្វែងយល់ពីអត្ថន័យ និងគោលបំណងនៃព្រឹត្តិការណ៍អង្គរសង្រ្កាន្តឆ្នាំ២០២៣ខាងមុខនេះ។

ជាមួយគ្នា​នេះ ឯកឧត្តមក៏បានលើកឡើងផងដែរ នូវបណ្តាបទពិសោធន៍ និងអនុស្សាវរីយ៍ជាច្រើនក្នុងព្រឹត្តិការណ៍អង្គរសង្រ្កាន្តកន្លងមក។ សិក្ខាសាលានាថ្ងៃនេះ ជាឱកាសនៃការជួបជុំគ្នា និងថ្លែងអំណរគុណចំពោះអ្នកសារព័ត៌មានដែលបានចូលរួមសហការប្រកបដោយប្រសិទ្ធភាព និងជួយឱ្យការផ្សព្វផ្សាយពីព្រឹត្តិការណ៍មានភាពល្បីល្បាញ និងទទួលបានការគាំទ្រពីមហាជន ក៏ដូចជាភ្ញៀវជាតិ និងភ្ញៀវអន្តរជាតិ។

គួរបញ្ជាក់ផងដែរថា សម្រាប់ព្រឹត្តិការណ៍អង្គរសង្រ្កាន្ត​ឆ្នាំ​២០២៣នេះ នឹងត្រូវធ្វើ​ឡើងក្រោមប្រធានបទ «ក្ដីស្រមៃ និងក្ដីសង្ឃឹម» នោះមានន័យថា (វាជាក្តីស្រមៃ និងក្តីសង្ឃឹមរបស់ក្រុមយុវជនកម្ពុជា ថានឹងសម្រេចឱ្យបាននូវគោលដៅដែលបានគ្រោងទុក) ។ អង្គរសង្ក្រាន្តក្នុងឆ្នាំ២០២៣នេះ នឹងមានការរៀបចំកាន់តែធំជាងមុន ដែលមានកម្មវិធីចំនួន៤៤កម្មវិធី លើទីតាំងចំនួន៦តំបន់ សម្រាប់បង្កបរិយាកាសដ៏សប្បាយរីករាយរយៈពេល៤ថ្ងៃនេះ(១៣-១៦ មេសា ២០២៣)។

ឯកឧត្តម សោម រតនា បានបន្ថែមទៀតថា ឆ្នាំ២០២៣នេះ នឹងមានបន្ទប់សម្រាប់ធ្វើការផ្សព្វផ្សាយព័ត៌មាន ដែលបំពាក់ដោយម៉ាស៊ីត្រាជាក់ សម្រាប់ក្រុមយុវជន និងសម្រាប់អ្នកសារព័ត៌មានផងដែរ ជាពិសេសមានអាហារសម្រន់សម្រាប់បងប្អូនអ្នកសារព័ត៌មានដែលបានចុះយកព័ត៌មានផ្ទាល់ និងមានកម្មវិធីចែករំលែក​រូបភាព ចែករំលែងព័ត៌មានសម្រាប់បងប្អូនអ្នកសារព័ត៌មានដែលមិនបានចូលរួមផ្ទាល់។ លើសពីនេះទៅទៀត និងមានវិញ្ញាសារចំនួនពីរសម្រាប់បំបែកកំណត់ត្រាពិភពលោកផងដែរ៕ ដោយ៖ ផ្លុងរ៉េត