ពលរដ្ឋផ្អើលមើលព្រះភក្រ្កសម្តេចឪនៅលើព្រះច័ន្ទ

ប្រ​ជា​ពលរ​ដ្ឋ​ទូទាំង​ប្រ​ទេស​កម្ពុជា​នាំ​គ្នា​ផ្អើល​មើល​ព្រះ​ភក្ត្ររបស់សម្តេចព្រះមហាវីរក្សត្រ សម្តេចព្រះ ន​រោត្តម សីហនុ នៅលើព្រះចន្ទ ឬលោកខែ ដែលរះមួយចំហៀងនៅយប់ថ្ងៃអាទិត្យ ទី២១ ខែតុលា ឆ្នាំ​២០១២​ វេលា​ម៉ោង​ប្រ​មាណ៧និង​៣៥នាទី។

ប្រ​ជា​ពល​រដ្ឋ​ទាំង​ចាស់ ទាំង​ក្មេង​ ដែលបានអុជធូប បួងសួង ឧទ្ទិសដល់ព្រះវិញ្ញាណក្ខន្ធសម្តេចព្រះ នរោត្តម សីហនុ នៅមុខព្រះបរមរាជវាំង បានងើយមើលព្រះចន្ទ ហើយក៏និយាយតៗគ្នាថា ព្រះ​ច័ន្ទ​រះ​ដូច​ព្រះ​ភក្ត្រ​របស់ព្រះមហាវីរក្សត្រ សម្តេចព្រះ នរោត្តម សីហនុ ហើយ​ដូច​ គ្នានឹងព្រះឆាយាលក្ខណ៍ ដាក់​តាំងយ៉ាងធំ នៅមុខព្រះបរមរាជវាំ

ប្រ​ជា​ពល​រដ្ឋ​​ចាស់ៗ ក៏បាននិយាយថា ព្រះចន្ទ ដែលបានរះនៅយប់នេះ ក៏ចំលែក​ណាស់​ដែរ ដោយ​រះ​នៅ​ទិស​ខាង​លិច ដែល​ជា​ធម្មតា​​ព្រះ​ចន្ទ ក្នុងថ្ងៃខែនេះ បើ​តាម​ការ​ចំ​ណាំ​គឺ ត្រូវរះនៅទិញខាងកើត។ ប្រ​ជា​ពល​រដ្ឋ​​អ្នកនៅមុខបរម​រជ្យ​វាំង រួម​ទាំងពលរដ្ឋខ្មែរដទៃទៀត បានទូរស័ព្ទទៅមិត្តភក្តិ និងក្រុមគ្រួសារ ទូ​ទាំង​ប្រ​ទេស​ ហើយ​និយាយ​ពី​ការ​ឃើញ​ព្រះភក្ត្ររបស់​ព្រះករុ​ណា ព្រះមហាវីរក្សត្រ លើព្រះ​ចន្ទ នាយប់​នេះ។

ប្រ​ជា​ពលរដ្ឋ​ដែល​បាន​ឃើញ​ព្រះ​ភក្រ្ក​ព្រះ​ករុណា​ព្រះ​បាទ​ នរោត្តម​ សីហនុ នា​យប់​នេះ​បាន​និយាយ​ថា កាល​ព្រះ​អង្គ​នៅ​មាន​ព្រះ​ជន​ព្រះ​អង្គ​តែង​តែ​ស្រលាញ់​កូន​ចៅ ដោយ​ផ្តល់​ស្នាម​ញញឹម​ជាប់​ជានិច្ច​ បើ​ព្រះ​អង្គ​យាង​ទៅ​ដល់​ទី​ណា ទី​នោះ​តែង​តែ​មាន​ផ្ទៃ​មេឃ​ស្រទុំ ដែល​ជា​ការ​ផ្តល់​ម្លប់​ដ៏ត្រជាក់​ដល់​កូន​ចៅ។ ប្រ​ជា​ពល​រដ្ឋ​បន្ថែម​ថា ព្រះ​ភក្រ្ក​ព្រះ​អង្គ​នៅ​លើ​ព្រះ​ច័ន្ទ​យប់​នេះ គឺ​បង្ហាញថា ព្រះ​អង្គទ្រង់​នៅ​តែ​គិត​ដល់កូន​ចៅខ្មែរទាំង​អស់ ហើយ​នៅ​ចាំ​មើល​ និង​ការ​ពារ​កូន​ចៅ​ ទឹក​ដី​កម្ពុជា​ជា​និរន្ត៕