ឈ្មួញរកស៊ីដឹកឈើក្រញូងខុសច្បាប់មួយក្រុមដែលមានគ្នាប្រហែលជិត១០នាក់ប្រដាប់ដោយអាវុធខ្លី បានដកកាំភ្លើងគំរាមកំហែងភ្ជង់បំរុងបាញ់សំលាប់អ្នកកាសែត និងដេញវាយអ្នកថតរូបក្នុងហេតុការណ៍ម្នាក់ ក្នុងគោលបំណងប្លន់យកកាមេរ៉ាទៅកំទេចចោល កាលពីវេលាម៉ោង១០និង៥០នាទីយប់ថ្ងៃទី២៧ខែតុលាឆ្នាំ២០១២នេះ។
ក្រុមអ្នកកាសែតដែលរងការគំរាមកំហែងបានអោយដឹងថា ដំបូងពួកគេបានឃើញរថយន្តម៉ាក តូយូតា តាកូម៉ា ពណ៍ខ្មៅ១បាំងកន្លះ និងរថយន្តម៉ាកកាមេរីសេរីឆ្នាំ៩៥ចង្កូតស្តាំពណ៍ទឹកប្រាក់ ដឹកឈើក្រញូងពេញ ហើយរថយន្តនេះប្រភពបានប្រាប់ថា បានចេញដំណើរពីស្រុកអន្លង់វែង ខេត្តឧត្តរមានជ័យធ្វើដំណើរទៅខេត្តកំពង់ចាម ដោយឆ្លង់កាត់ខេត្តសៀមរាប។ លុះមកល់ចំណុចឃុំស្រែណូយ ស្រុកវារិន ខេត្តសៀមរាបតាមដងផ្លូវលេខ៦៧(ផ្លូវហៃវ៉ែ) ក្រុមអ្នកកាសែតទាំងនោះបានដេញតាមពីក្រោយ ក្នុងគោលបំណងប្រមាញ់យកព័ត៌មាន។ ក្រុមអ្នកកាសែតបន្តថា នៅពេលពួកគេដេញតាមរថយន្តដឹកឈើក្រញូងខុសច្បាប់ទាំង២គ្រឿងខាងលើ ស្រាប់មានរថយន្តម៉ាកតូយូតាវីហ្គូពណ៍ទឹកប្រាក់ ពាក់ស្លាកលេខ ភ្នំពេញ 2A-5220 មួយគ្រឿងដេញតាមកៀររថយន្តរបស់ពួកគេ និងព្យាយាមបិទរថយន្តពួគេមិនអោយតាមរថយន្តដឹកឈើ ហើយពេលមកដល់ចំណុច ភូមិដកពោធិ៍ ឃុំឃុនរាម ស្រុកបន្ទាយស្រី រថយន្តដឹកឈើបានបទឆ្វេងចូលផ្លូវលំតាមព្រៃជាប់ស្នាក់ការ ឧទ្យានជាតិព្រះជ័យវរ្ម័ន-នរោត្តម ”ភ្នំគូលេន“ (អ្នកទូទៅហៅថា ស្នាក់ការបរិស្ថានក្រសួងនៅក្បាលស្ពាន)។ ពួកគេបន្តថា ក្រុមឈ្មួញខាងលើបានឈប់រថយន្តហើយនាំគ្នាចុះពីរថយន្តប្រដាក់ដោយកាំភ្លើងខ្លីជាច្រើនដើម បានភ្ជង់ក្បាលមន្រ្តីបរិស្ថានក្រសួងមួយរូបដែលជាកំលាំងបង្រ្កាបបទល្មើសប្រចាំភូមិភាគ៤របស់រដ្ឋមន្រ្តីស្តីទីខៀវមុត និងគ្នាគេម្នាក់ទៀតចាប់ក្របួចកអាវអ្នកកាសែតដែលអង្គុយក្នុងរថយន្តជាមួយមន្ត្រីបរិស្ថាននោះ។ ឃើញហេតុការណ៍ដូច្នេះចាងហ្វាងកាសែតម្នាក់បានទាញកាមេរាថតរូបសកម្មភាពដ៏ឃោឃៅខាងលើ តែក៏ត្រូវបានបក្សពួកឈ្មួញម្នាក់ កាច់មែកឈើដេញតាមវាយយកកាមេរាពីអ្នកកាសែតរូបនោះ តែសំណាងល្អចាងហ្វាងកាសែតនោះបានរតទៅអោយ ក្រុមមន្រ្តីបរិស្ថានក្បាលស្ពានដែលមានស្នាក់ការជាប់ផ្លូវនោះជួយទាន់។ ក្រុមអ្នកកាសែតបន្ថែមថា ពួកគេបានរាយការណ៍ជូនលោក ទី-សុវិនថាល់ ព្រះរាជអាជ្ញាសាលាដំបូងខេត្តសៀមរាបតាមទូរស័ព្ទ ក្នុងពេលមុន និងកំពុងចំរូងចំរាស ទើបបណ្តាលអោយពួកគេនាំគ្នាឡើយរថយន្តបើករុកចូលតាមផ្លូវលំ សំដៅទៅក្រោយជើងភ្នំគូលេន និងក្រោយកងពលធំអន្តរាគមន៍លេខ២បាត់ទៅ។
លោក កែវសាវឿន (ហៅធំ) នាយរងស្នាក់ការបរិស្ថានក្បាលស្ពាន បានប្រាប់អោយដឹងនៅព្រឹកថ្ងៃទី២៨នេះថា កាលពីយប់មិញដំបូងលោកស្មានថា គេឈ្លោះគ្នាដេញវាយតប់គ្នា តែស្រាប់តែលោកបានឃើញអ្នកកាសែត១រូបដែលលោកធ្លាប់ស្គាល់រតសំដៅអោយលោកជួយ ហើយឃើញឈ្មួញដឹកឈើក្រញូងមួយរូបកាន់មែកឈើតាមវាយ និងតាមឆក់យកកាមេរ៉ាពីអ្នកកាសែតរូបនោះ។ លោកធំបន្តថា ភ្លាមនោះលោកបានហៅកូនចៅអោយពាក់ឯកសណ្ឋានប្រដាប់ដោយអាវុធវែង ខ្លះជិះរថយន្ត ខ្លះជិះម៉ូតូ ជួយដេញតាមក្រុមឈ្មួញដឹកឈើក្រញូងខុសច្បាប់ខាងលើ រហូតដល់ម៉ោងជិត១ទាបភ្លឺ តែអកុសល់រថយន្តអ្នកកាសែតមួយគ្រឿងដែលដេញតាមដែរនោះបានខូច ហើយម្យ៉ាងទៀតស្ថានភាពផ្លូវពិបាកធ្វើដំណើរផង ផ្លូវបែកខ្ញែកច្រើនផង ទើបបណ្តាលអោយក្រុមក្បត់ជាតិនេះរតរួចបាត់ទៅ ដែលជារឿងគួរអោយសោកស្តាយបំផុត។
ប្រភពពីស្រុកអន្លងវែងខេត្តឧត្តរមានជ័យបានអោយដឹងថា ក្រុមឈ្មួញខាងលើបានរកស៊ីយូរដែរហើយ តែគ្មានសមត្ថកិច្ចណាហ៊ានបង្រ្តាបទេ ព្រោះពួកគេតែងតែស្លៀកសំលៀកបំពាក់ជាទាហ៊ាន ប្រដាប់ដោយអាវុធច្រងេងច្រងាក ហើយបើកបរក្នុងល្បឿងប្តេចប្រលឹង មានរថយន្តបិទគូទពីមុខពីក្រោយជាច្រើន។
ប្រភពពីអតីតអ្នកធ្លាប់រកស៊ីដឹកឈើក្រញូងនៅស្រុកអន្លង់វែងម្នាក់បានលួចខ្សឹមប្រាប់ថា ថៅកែរថយន្តដឹកឈើក្រញូងខាងលើនេះ ឈ្នោះ ចូច ជាថៅកែលក់សាំងស្រុកអន្លង់វែង ដែលជាអ្នកមានលុយដោយសារកស៊ីដឹកឈើក្រញូងខុសច្បាប់នេះឯង។
លោក វែងលី មន្រ្តីរដ្ឋបាលព្រៃឈើប្រចាំស្រុកប្រាសាទបាគងបានប្រាប់ថា កាលប្រហែលជាង២ខែមុនលោកបានដេញតាមរថយន្តតាកូមាដឹកឈើក្រញូងភិនភាគស្រដៀងខាងលើ តាំងពីខេត្តសៀមរាបដល់ខេត្តកំពង់ធំម្តង។ លោកលីបន្តថា លោកបានទូរស័ព្ទសុំអោយសមត្ថកិច្ចតាមដងផ្លូវស្ទាក់ដាក់បារាស តែរថយន្តនេះបានបើកៀរបារាសទៀត រួចគេចចូលផ្លូវលំតាមខ្លោទ្វារវត្តមួយដែលឆ្ងាយពីផ្លូវជាតិហើយស្ងាត់ លោកក៏បានបកក្រោយវិញព្រោះបារម្ភពីសុវត្តិភាព តែមានខាងប៉ូលីសសេដ្ឋកិច្ចបានដេញតាមបន្ត។ លោកលីបន្ថែមថា ប្រហែល៣០នាទីក្រោយមកលោកបានទទួលដំណឹងតាមទូរស័ព្ទ ពីក្រុមប៉ូលីសសេដ្ឋកិច្ចថា ពួកក្រុមឈ្មួញខាងលើបានដកកាំភ្លើងភ្ជង់ប៉ូលីសដើប្បីអោយរថយន្តដឹកឈើគេគេចទៅដោយរលួនបាត់ទៅ។
សូមបញ្ជាក់ថា លោក ទី-សុវិញថាល់ ព្រះរាជអាជ្ញាសាលាដំបូងខេត្តសៀមរាប លោកបានដឹកនាំព្រះរាជអាជ្ញារង ក្រឡាបញ្ជី ខ្លាហោះ និង លោក អ៊ំ-អមរា ស្នងការរងខេត្តសៀមរាប ចុះទៅដល់រង្វង់មូលស្រុកបន្ទាយស្រីភ្លាមៗដើម្បីឡោមព័តក្រុមឈ្មួញខាងលើ តែពួកគេបានដឹងខ្លួនមុនក៏បើកទាំងឡានមានឈើ ទាំងឡានរតការឈើ រតគេចតាមព្រៃជើងភ្នំគូលេនអស់បាត់ទៅ។
អ្នកយកព័ត៌មានយើង និងព្យាយាមតាមស៊ើបអង្កេតរកម្ចាស់ឈើ និងរថយន្តដឹកឈើខាងលើ មកចុះផ្សាយជាភាគបន្ត ជូនមិត្តអ្នកអាន ដែលជាប្រយោជដល់ តុលាការក្នុងការចាត់ការពួករកស៊ីដឹកឈើក្រញូងខុសច្បាប់ទាំងនេះ៕
.jpg)
.jpg)
.jpg)
.png)
.jpg)
.jpg)
.jpg)
