លោក មឿងសុន ផ្ញើសេចក្តីអំពាវនាវជូនសម្តេច​ ហ៊ុនសែន

លោក មឿង សុន ប្រធានអង្គការមូលនិធិទ្រទ្រង់អរិយធម៌ខ្មែរបានធ្វើជា លិខិតអំពាវនាវមួយច្បាប់ ផ្ញើជូន​លោក ហ៊ុន សែន នាយករដ្ឋមន្ត្រី នៃប្រ ទេសកម្ពុជា ដែលខ្លឹមសារ​លិខិតនោះបា​ន​ផ្តោតយ៉ាងសំ​ខាន់លើការសុំឲ្យ លោកនាយករដ្ឋមន្ត្រីលើកលែងទោសដល់រូបលោក ។

ខាងក្រោមនេះជាសេចក្តីអំពាវនាវរបស់លោក មឿង សុន ប្រធានអង្គការ មូលនិធិទ្រទ្រង់អរិយធម៌ខ្មែរ ដែលមានខ្លឹមសារដើមទាំងស្រុង ដូចតទៅ ៖

ខ្ញុំ មឿង សុន ប្រធានអង្គការមូលនិធិទ្រទ្រង់អរិយធម៌ខ្មែរជូនចំ​ពោះលោក-លោកស្រី អ្នកសារព័ត៌មាន ជាទីគោរពរាប់អាន។

ខ្ញុំគិតថាអ្នកដែលនិយមការរស់នៅដោយធ្វើតែអំពើល្អ និងស្មោះត្រង់ចំពោះផលប្រយោជន៍ជាតិ និងអ្នកដ៏ទៃ គឺគង់មានពេលណា មួយជួបអ្នកមានចិត្តបុណ្យដែល​គេចង់រស់នៅក្នុង​សង្គមជាតិដោ​យមានកេរ្តិ៍ឈ្មោះ​និងស្លាប់ដោយកិត្តយសជួយមិនខាន។ ហេតុនេះ ខ្ញុំខំបន្តសរសេរលិខិតសុំទៅប្រមុខរដ្ឋាភិបាល រហូតដល់​ថ្ងៃដែលខ្ញុំបានវិលចូលមាតុប្រទេសវិញ ទោះបីជាមានលិខិតជាច្រើនធ្លាប់ បានផ្ញើជូនសម្តេច ហ៊ុន សែន តែពុំដែលបានទទួលការឆ្លើយតប ដែលចុងក្រោយកាលពី ខែវិច្ឆិកា ឆ្នាំ២០១២ បានច្រានចោល ដោយខុទ្ទ​កាល័យរបស់សម្តេចក៏ដោយ។

សំខាន់ពេលនេះមានបុណ្យបូជាព្រះសព សម្តេចឪ រួមទាំងមានការដោះលែង​អ្នកទោសនយោ​បាយបរទេស​ជនជាតិថៃ ដែលបាន ចូលដែនដីកម្ពុជាខុសច្បាប់តែសំណាងបានរួចទោសដោយការប្រោសប្រណីពីសម្តេច ហ៊ុន សែន។ ហេតុ​នេះរឿងដែលតុលាការ បានដាក់ទោសដល់រូបខ្ញុំ ក៏ខ្ញុំបន្តក្តីសង្ឃឹមនឹង​មានការលើក​លែងទោសដែរ ព្រោះខ្ញុំជាកូនខ្មែរធ្លាប់បានរួមចំណែកក៏សាងមាតុប្រ ទេសកន្លងមក​ត្រូវបានជាប់​ទោសពីបទ​ញុះញង់ ព្រោះតែអង្គការយូណេស្កូបានតម្រូវឲ្យ ក្រុមហ៊ុន ស៊ូ ជិន ដកអំពូលភ្លើងនៅតាម ជញ្ជាំងនិងតាមថែវ​ប្រាសាទ ដែលស្របតាមលិខិតផ្តល់មតិរបស់ខ្ញុំដាក់ជូនសម្តេច ហ៊ុន សែន ក្នុងបំណងរួមចំណែកថែរក្សា​ប្រា​សាទ បូរាណខ្មែរអង្គរវត្តឲ្យមានអាយុកាលវែង និងមិនឲ្យខូចតម្លៃសម្រាប់ភ្ញៀវទេសចរណ៍ ។

ដើម្បីជាក្តីសង្ឃឹមរបស់ខ្ញុំ ចំពោះលិខិតដែលជូនជាប់ជាមួយត្រូវបានយ​កទៅដាក់នៅខុទ្ទកាល័យវិមាន​ឯករាជ្យនៅថ្ងៃ ទី២១ ខែមករា ២០១៣ មិនច្រានចោលដូចកាលពីមុន និងសង្ឃឹមអាចបានដឹងឮដល់ សម្តេច ហ៊ុន សែន ខ្ញុំសូមលោក-លោកស្រីអ្នកសារ​ព័ត៌​មាន មេត្តាជួយចុះផ្សាយឲ្យដោយ ក្តីអនុគ្រោះផង៕