ឌុច សុភា និងអេនឌី យកវេទិកាទូរទស្សន៍ វាយប្រហាអ្នកកាសែត ព្រោះរឿងផ្ទាល់ខ្លួន

កាលពីយប់ថ្ងៃទី២២ ខែសីហា ឆ្នាំ២០១២កន្លងមកនេះ នៅក្នុងកម្មវិធី "ប៉ុស្តិ៍លេខ២១" របស់ស្ថានីយទូរទស្សន៍ ស៊ី ធី អ៊ីន តារាប្រុសស្រី៣ដួង បានយកកម្មវិធីនេះធ្វើជាវេទិកាតុមូលពិភាក្សាគ្នា ដោយប្រើពាក្យសម្ដីមើលងាយមើលថោក លើក្រុមអ្នកសារព័ត៌មាន ដោយសារតែកំហឹងផ្ទាល់ខ្លួន ។

អ្នកមេម៉ាយចាយសម្រស់ ដែលសម្បូររឿងអាស្រូវ នាង ឌុច សុភា បានប្រើពាក្យសម្ដីមិនសមរម្យ វាយប្រហារមិនសំចៃមាត់ មកលើអ្នកកាសែត ដោយបានលើកឡើងក្នុងកម្មវិធីនោះ ថានៅពេលដែលអ្នកការសែតសម្ភាសន៍ ហើយនាងធ្វើការបកស្រាយ ពីបញ្ហាដែលគេសួរ ប៉ុន្តែនៅពេលដែលអ្នកការសែតចុះផ្សាយ បែរជាចុះផ្សាយខុសពីការពិត ដែលនាងបានផ្តល់ឲ្យអ្នកការសែត មូលហេតុទាំងអស់នេះ ហើយដែលធ្វើឲ្យនាងតែងតែ ព្យាយាមគេចមុខពីអ្នកកាសែត និងមិនចង់ផ្តល់បទសម្ភាសន៍។

តារាស្រីដែលអះអាងថា ខ្លួនល្អស្ទើរតែគ្មានចន្លោះរូបនេះ បានប្រាប់ឲ្យដឹងទៀតថា "ខ្ញុំមិនធ្លាប់បានទិញ ឬក៏មើលទស្សនាវដ្តី សូម្បីតែ១ក្បាល ព្រោះថាខ្ញុំមិនអាចទទួលយកនូវព័ត៌មាន ដែលគេចុះផ្សាយនោះទេ ហើយខ្ញុំក៏អន់ចិត្តជាមួយ សារព័ត៌មានស្ទើរ តែចង់ដកថយ ព្រោះពេលបកស្រាយផ្សេង ហើយនៅពេលដែលយកទៅសរសេរផ្សេង"។

មិនត្រឹមតែប៉ុណ្ណោះ តារាស្រីរូបនេះ បានប្រើពាក្យសំដីមើលងាយ ដល់អ្នកកាសែត ប្រសិនបើគេមិនឃើញរូបពិតសំឡេងពិតទេ គេមិនជឿទេថា ពាក្យទាំងអស់នេះ ចេញពីមាត់របស់តារាស្រីរូបនេះឡើយ។ ដោយនាងបាននិយាយថា ការងារ និងប្រាក់ខែរបស់អ្នកកាសែត គឺបានមកពីតារា បើគ្មានតារាទេក្រុមអ្នកកាសែតក៏គ្មានប្រាក់ខែដែរ។

អ្នកមេម៉ាយកូន១ នាង ឌុច សុភា និយាយមិនទាន់ចប់ផងតារាប្រុស លោក អេនឌី ក៏បាននិយាយភ្ជាប់ភ្លាមៗថា ការប្រឡូកក្នុងវិស័យសិល្បៈ អស់រយៈពេលមិនតិចជាង១២ឆ្នាំនេះ លោកស្ទើរតែមានការដកថយ ក៏ដូចជានឿយណាយ ជាមួយអាជីពជាអ្នកសិល្បៈ ដោយសារតែអ្នកកាសែត ព្រោះថាជាញឹកញាយពួកគេតែង តែចុះផ្សាយតែរឿងមិនល្អ មិនដែលឃើញអ្នកកាសែត សរសេរឲ្យតម្លៃមកលើតារាទាល់តែសោះ។

តារាប្រុសរូបនេះក៏បានលើកឡើងថា " នាពេលបច្ចុប្បន្ននេះខ្ញុំមិនដែល ហ៊ានសូម្បីតែបើកទូរទស្សន៍មើល ថែមទៀតផង ហើយជាពិសេសនោះ នៅពេលដែលខាងអ្នកកាសែតទូរស័ព្ទ មកសម្ភាសន៍ខ្ញុំ ក៏ដូចជាតារាដទៃ គឺសួរសំណួរផ្សេង តែនៅពេលចុះផ្សាយស្រាប់ តែនិយាយផ្សេង មិនតែប៉ុណ្ណោះ នៅពេលដែលសរសេរ តែងតែអះអាង ថាមានប្រភពពីនេះពីនោះ មកនិយាយ"។

នៅក្នុងកម្មវិធីនោះដែរ ពិធីការិនីដែលមានភាពលេចធ្លោប្រចាំស្ថានីយទូរទស្សន៍ CTN និងជាពិធីការិនីសម្របសម្រួលក្នុងកម្មវិធី ”CTN ប៉ុស្តិ៍លេខ២១” អ្នកនាង យុគ ចិន្តា ក៏បានធ្វើការបញ្ចេញមតិ ដោយវាយប្រហារដែលថា "ធម្មតានៅ ពេលដែលយើង ផ្តល់បទសម្ភាសន៍ ទៅអ្នកកាសែត១០០ពាក្យ គឺគេយកពាក្យយើងទៅចុះផ្សាយតែ១០ពាក្យ ប៉ុណ្ណោះ៩០ ពាក្យទៀតគឺគេ បំបាត់ចោលអស់ហើយ"។ និយាយជារួម គឺសម្ភាសន៍ឲ្យតែបានសម្ភាសន៍ តែអ្នកកាសែតមិនបានខ្វល់ពីការ បកស្រាយរបស់តារានោះទេ។

ទន្ទឹមនឹងការ លើកឡើងរបស់តារាទាំង ៣ដួងនេះដែរ ក៏មានតារាមួយចំនួន ដែលមានឈ្មោះបោះសំឡេង តែពួកគេមិនធ្លាប់ត្រូវបាន ខាងសារព័ត៌មានចុះពីរឿងអាស្រូវនោះទេ ដោយសារតែពួកគេបានរក្សា កេរ្តិ៍ឈ្មោះមិនឲ្យប្រឡាក់ប្រឡូក ជាមួយរឿងអាស្រូវ ដោយមានដូចជា លោក ព្រាប សុវត្ថិ អ្នកនាង ហ៊ឹម ស៊ីវន លោក ណូយ វ៉ាន់ណេត ព្រមទាំងតារាល្បីៗមួយចំនួនទៀត។
តែអ្វីដែលធ្វើឲ្យអ្នកការសែតចុះផ្សាយ ពីរឿងអាស្រូវរបស់តារាមួយចំនួននោះ គឺដោយសារតែពួកគេ ទាំងអស់នោះមិនបានថែរក្សា កេរ្តិ៍ឈ្មោះរបស់ខ្លួនឲ្យល្អទេ ហើយនៅពេល ដែលគេចុះផ្សាយថាខ្លួនមិនល្អ តែងតែចេញមុខបដិសេធប្រកែកថា ខ្លួនមិនបានធ្វើខុស អះអាងតែពាក្យ មិនពិតថាខ្លួនធ្វើត្រូវ រហូតដល់គ្មានចំណុចខុសទាល់តែសោះ ។

ការលើកឡើង របស់ឌុច សុភា នៅពេលនេះត្រូវបាន ក្រុមអ្នកសារព័ត៌មាន និយាយចំៗថា ជាបុគ្គលភ្លេចកំណើតដើម ព្រោះមុនពេលល្បី នាងឌុច សុភា និងលោកអែនឌី ក៏បានមកពឹងពាក់ឲ្យអ្នកសារព័ត៌មានជួយចុះផ្សាយ និង ថែមទាំងផ្ដល់នូវរូបថត ល្អៗ ស្អាតៗ ដល់អ្នកកាសែតទៀតផង។ ចុះពេលបានល្បី ម្ដ៉េចចាំបាច់ស្អប់អ្នកកាសែត ? ឬមកពីអ្នកកាសែត សរសេរចំកន្លែងរសើប និងជារឿងគួឲ្យអាម៉ាស់ ដែល ឌុច សោភា មិនចង់ឲ្យមហាជនដឹង?