ដើម្បីបញ្ចប់ពាក្យចចាមអារ៉ាមស្នេហាជាមួយតារាកំប្លែងក្នុងក្រុម នាយពែកមី នៅពេលនេះនាង ខ្ញុង បានចេញមុខប្រកាសដោយមិនលាក់លៀមថា នាងកំពុងត្រៀមខ្លួនធ្វើជាកូនក្រមុំ របស់បុរសឯនាយសមុទ្រ មិនមែនជាមួយនាយ ពែកមី នោះទេ។
ទន្ទឹមនឹងកេរ្តិ៍ឈ្មោះក្រុម កំប្លែង CTN ទទួលបានការគាំទ្រពីមហាជនគ្រប់ទិសទីនោះ តារាកំប្លែងពីរដួង ដែលជាតារាកំប្លែងឆ្នើមរបស់ក្រុមគឺ នាង ខ្ញុង និងនាយ ពែកមី ក៏ផ្តើមមានពាក្យលេចឮថា ពួកគេមិនមែនមានភាពស្និទ្ធស្នាល និងផ្អែមល្ហែម តែនៅលើឆាកកំប្លែងនោះទេ ខាងក្រៅឆាកក៏ពួកគេបន្តមានទំនាក់ទំនងស្នេហានឹងគ្នាដែរ រហូតល្បីថា ពួកគេម្នាក់ៗហ៊ានក្បត់ចិត្តប្តីប្រពន្ធស្របច្បាប់ ហើយមកលួចរួមរស់ជាមួយគ្នាក្រោមដំបូលតែមួយទៀតផង។
ចំពោះរឿង នេះ ទាំងនាង ខ្ញុង និងលោក ពែកមី ក៏មិនព្រមសម្ងំខ្លួនពួនទទួលពាក្យលេចឮមិនល្អនេះដែរពោលគឺពួក គេតែងស្វែងរកការបកស្រាយចំពោះពាក្យចចាមអារ៉ាមនោះ តែយ៉ាងណាមន្ទិលទាំងនោះនៅតែលាងជម្រះមិនបាន១០០ភាគរយឡើយ។
ដើម្បី លុបចោលការសង្ស័យទាំងនោះ តារាកំប្លែងដែលកំពុងអង្រួនឆាក CTN នាង ខ្ញុង ដែលមានឈ្មោះដើម ស្រេង សុកាន់ដា បានដាច់ចិត្តនិយាយរឿងខ្លួនមិនលាក់លៀមថា៖«តាំងពីមុនដំណើរដើរ មកកាន់ឆាក សិល្បៈកំប្លែងនេះម្ល៉េះ ខ្ញុំ និងស្វាមី អាជីវករនៅខេត្តសៀមរាបនោះ បានលែងលះគ្នាដាច់ស្រាច់ ក្រោយរៀបការបានពីរឆ្នាំ»។ នាងបន្តថា៖«ដំបូងឡើយ ខ្ញុំសម្រេចចិត្តនឹងមិននឹកនាគិតរឿងប្ដីសីអីទៀតទេ ព្រោះតែខ្លាចប្ដីក្រោយគេចិត្តមិនបានជាមួយកូនរបស់ខ្ញុំ។ ប៉ុន្តែមកដល់ឥឡូវបានប្ដូរចិត្តវិញហើយត្រូវតែរកមើលបុរសណា ម្នាក់អាចទុកចិត្តបានសម្រាប់អនាគត»។
តារាកំប្លែងមាត់ដាច នាង ខ្ញុង ក៏បានបញ្ជាក់ថា៖«ការបញ្ចប់សម្ព័ន្ធភាពស្នេហាប្តីប្រពន្ធមុននេះ មិនមានពាក់ព័ន្ធនឹងដំណើរ ចូលមកកំប្លែងនៅភ្នំពេញនេះទេ ពោលគឺដោយហេតុផលរស់នៅមិនចុះសម្រុងគ្នា តាំងពីមុននោះ ប្តីខ្ញុំប្រចណ្ឌគ្មានហេតុផល»។
ដោយឡែកទាក់ទងនឹងពន្លកស្នេហ៍ ថ្មីដែលនាងគិតថានឹងបើកបេះដូងជាថ្មីនោះ មិនមែនតារាកំប្លែង ពែកមី ទេ។ ខ្ញុងនិយាយថា៖«បុរសដែលខ្ញុំភ្ជាប់ទំនាក់ទំនងនោះមិនមែនជាបង ពែកមី ដូចដែលពាក្យឮនាពេលកន្លងមកនោះទេ ផ្ទុយទៅវិញបុរសនោះ គាត់ស្គាល់ខ្ញុំក៏តាមរយៈបង ពែកមី ដែរ។ ខ្ញុំបានស្គាល់បុរសនៅខាងក្រៅស្រុកម្នាក់ ហើយមកទល់ពេលនេះ ពួកខ្ញុំបានភ្ជាប់ទំនាក់ទំនងស្នេហានឹងគ្នាជាងមួយឆ្នាំហើយ ក្រោយពីគាត់សុំលេខទូរស័ព្ទខ្ញុំពីបង ពែកមី»។
បើទោះជា នាង អះអាងថា មានគូកំណាន់ចិត្តយ៉ាងនេះក៏ដោយ ប៉ុន្តែនាងបានបដិសេធមិនបង្ហាញពីអត្តសញ្ញាណ និងប្រទេសដែលសង្សាររស់នៅឡើយ។ អ្នកមេម៉ាយ ដែលនៅតែជាប់ដិតដាមសំពាយស្នេហ៍ជាមួយមេក្រុម លោកពែកមី រូបនេះ បានប្រាប់ថា៖ «មិនទាន់ដល់ពេលដែលខ្ញុំត្រូវបង្ហាញពីអត្តសញ្ញាណ និងប្រទេសដែលគាត់កំពុងរស់នៅទេ ចាំជិតដល់ថ្ងៃដែលថា ចូលរោងការនោះ ខ្ញុំនឹងប្រាប់ភ្លាម មិនលាក់លៀមទេ»។
នាង ខ្ញុង បានអះអាងថា ដ្បិតថាបុរសនោះ និងនាងនៅមិនទាន់បានមកជួបមុខគ្នាក្តី តែបុរសក្រៅស្រុករូបនោះលង់ស្នេហ៍លើនាងខ្លាំងណាស់ ហើយពេលនេះគូស្នេហ៍នាងក៏អន្ទះសាណាស់ដែរ តែងសុំនាងរៀបការ តែនាងអត់ទាន់សម្រេចចិត្ត ឬផ្តល់ចម្លើយទៅវិញយ៉ាងណានៅឡើយទេ។
នាង បានបញ្ជាក់ទៀតថា៖«ខ្ញុំក៏ត្រូវការពេលវេលាខ្លះដែរ ដើម្បីសង្កេតមើលបន្តិចទៀតសិន តែក៏មិនបន្លាយពេលវេលាឲ្យវែងឆ្ងាយពេកនោះដែរ ខ្ញុំនឹងសម្រេចចិត្តក្នុងពេលឆាប់ៗខាងមុខនេះ ដើម្បីកុំឲ្យបុរសឆ្លងទ្វីបនោះអន្ទះសាពេក»។
យ៉ាងណាមិញ ការសម្រេចចិត្តជ្រើសយកគូស្រករឲ្យបានឆាប់នេះ ក៏មានហេតុផលពាក់ព័ន្ធនឹងតារាកំប្លែង ពែកមី ដែរដោយនាងនិយាយថា ការសម្រេចទទួលយកជំនូនស្នេហ៍បុរសឯនាយសមុទ្រនេះ ក៏ដើម្បីបន្សាបនូវពាក្យចចាមអារ៉ាមមួយចំនួនដែលបោកខ្ទប់មកលើនាង និងលោក ពែកមី ដែលថាមានទំនាក់ទំនងស្នេហាក្រៅឆាកដ៏ផ្អែមល្ហែមជាមួយគ្នា ដល់ថ្នាក់ទៅរួមរស់ជាមួយគ្នានោះដែរ។ ដូច្នេះការសម្រេចចិត្តយកប្ដីក្នុងពេលឆាប់ៗនេះ ជារឿងមួយល្អដើម្បីកុំឲ្យកើតមានបញ្ហាវែងឆ្ងាយ»។
នាងបញ្ជាក់ថា ការព្យាយាម រស់លាក់បាំងសមាសភាពជាស្ត្រីមេម៉ាយកន្លងមក មិនមែនដើម្បីជារនាំងបិទបាំងស្នេហ៍ជាមួយបុរសណានោះទេ តែជាហេតុផលមួយដើម្បីការងារ និងចំណូលពីសិល្បៈ ប្រសិនបើគេដឹងនាងម៉េម៉ាយគេមិនចង់បាននាងកាត់សក់នោះទេ៕
.jpg)
.jpg)
.jpg)
.jpg)
.jpg)
.jpg)
.jpg)
.jpg)
.jpg)
.jpg)
