ឆ្លងដែនទៅឆក់ខ្សែកនៅស្រុកថៃ ត្រូវតម្រួតថៃចាប់បញ្ជួនទៅអោយដេកគុគ

ស្រ្តីជនជាតិថៃម្នាក់ត្រូវ​បាន​បុរស់ជនជាតិខ្មែរ​ ឆ្លងដែនទៅឆក់​ខ្សែក​ នៅវេលា​ម៉ោង​៨:២៥​នាទី ព្រឹក​ថ្ងៃ​ទី​១៦ ខែវិច្ឆិកា ឆ្នាំ​២០១៤ នៅ​ចំណុច​ផ្សារ​ថៃ ស្ថិតនៅ​ភូមិ​សូន្យ​សាន ឃុំ​តាប់​ថៃ ស្រុក​តាប់​ប្រា​យ៉ា ខេត្ត​ស្រះកែវ ប្រទេស​ថៃ ដែល​ឈម​នឹង​ភូមិ​ប្រាសាទ​ត្បែង ឃុំ​បន្ទាយឆ្មារ ស្រុក​ថ្មពួក ខេត្ត​បន្ទាយមានជ័យ​។​

​បើ​យោង​តាម​ប្រភព​ព័ត៌មាន​ពី​នគរបាល​ការពារ​ព្រំដែន​គោក​លេខ​៨០៧ ដែល​ឈរជើង​នៅ​ស្រុក​ថ្មពួក បាន​ប្រាប់ឲ្យដឹង​ថា បុរសជា​ជន​​សង្ស័យ​ដែល​ត្រូវ​តម្រួត​ថៃ​ចាប់​ឃាត់ខ្លួន​ឈ្មោះ សំរិទ្ធ សុជា អាយុ​៣៣​ឆ្នាំ បច្ចុប្បន្ន​រស់នៅ​ភូមិ​អូរអណ្តូង សង្កាត់​អូរ​ចា ក្រុង​បាត់ដំបង ខេត្ត​បាត់ដំបង​។​សមត្ថ​កិច្ច​បាន​ប​ន្ត​ឲ្យដឹងថា ជន​​សង្ស័យ​បាន​ចូល​ធ្វើ​សកម្មភាព​ឆក់​ខ្សែ​កនៅ​ផ្សារ​ថៃ ស្ថិត​នៅ​ចំណុច​ខាងលើ ដែល​ក្រុម​អាជីវករ​គេ​បើក​លក់ដូរ​នៅ​ថ្ងៃ​សៅរ៍ និង​អាទិត្យ ហើយ​មាន​ប្រជា​ពលរដ្ឋ​ខ្មែរ និង​ប្រជាពលរដ្ឋ​ថៃ​ជា​ច្រើន​នាក់​ចូល​ទៅ​ទិញ​ឥវ៉ាន់​នៅ​ទីនោះ​ផងដែរ​។ សមត្ថកិច្ច​បន្ថែមថា ជនសង្ស័យ​ខាងលើ ជា​មុខសញ្ញា​ធ្លាប់​ធ្វើ​សកម្មភាព​ឆក់​ខ្សែក​ប្រជា​ពលរដ្ឋ​ខ្មែរ និង​ថៃ នៅក្នុង​ផ្សារ​ថៃ ចំនួន​៣ ទៅ​៤​លើក​មក​ហើយ រាល់​ពេល​ធ្វើ​សកម្មភាព​នោះ ពុំ​ត្រូវបាន​គេ​ចាប់​ឃាត់ខ្លួន​នោះ​ទេ ទើប​តែ​លើក​ចុងក្រោយ​នេះ ក៏​ត្រូវ​បាន​តម្រួត​ថៃ ចាប់​ឃាត់ខ្លួន​បាន​តែ​ម្តង​។​

ក្រោយពី​ធ្វើ​​ការឃាត់ខ្លួន ជន​ស្ស័​យឈ្មោះ​ សំរិទ្ធ សុជា ​ត្រូវ​បាន​សមត្ថ​កិច្ច​ថៃ​បញ្ជូន​ទៅកាន់​ខេត្ត​ស្រះកែវ ដើម្បី​​ចាត់ការ​តាម​ផ្លូវច្បាប់​នៅក្នុង​ប្រទេស​ថៃដោយរលួនបាត់ទៅហើយ​៕