បាក់ស្រុតផ្ទះប្រជាពលរដ្ឋបីខ្នងទាំងកណ្តាលយប់

ផ្ទះប្រជាពលរដ្ឋបីគ្រួសារត្រូវបានបាក់ស្រុតលិចចុះទៅក្នុងដី ជំរៅ ៤ម៉ែត្រ ធ្វើឲ្យប្រជាពលរដ្ឋជាច្រើនរស់ក្បែរកន្លែងកើតហេតុភ្ញាក់ផ្អើលទាំង កណ្តាលអាធ្រាត្រ។  
ហេតុការណ៏ខាងលើនេះបានកើតឡើងកាលពីវេលាម៉ោង ២៤ និង ១០នាទីរំលងអធ្រាត្រឆ្លងចូលថ្ងៃទី២៦ ខែសីហា ឆ្នាំ២០១២ បច្ចុប្បន្នពួកគាត់កំពុងតែរស់នៅក្នុងភូមិទ្រាទី២ សង្កាត់ស្ទឹងមានជ័យ ខណ្ឌមានជ័យ ក្រុងភ្នំពេញ ។

លោកសេង សាញ់ ចៅសង្កាត់ស្ទឹងមានជ័យបានឲ្យដឹងថា នៅមុនពេលកើតហេតុប្រជាពលរដ្ឋទាំងបីគ្រួសារកំពុងតែដេកលង់លក់ លុះដល់វេលាម៉ោងខាងលើក៏ស្រាប់តែផ្ទះរបស់ពួកគាត់លាន់ឮព្រឹបៗ ប្រហែលជា១០នាទីក្រោយមកផ្ទះរបស់ពួកគាត់បានបាក់ស្រុតតែម្តង។ ម្ចាស់ផ្ទះ និងប្រជាពលរដ្ឋដែលនៅក្បែរនោះបានភ្ញាក់ផ្អើល ហើយក៏បានរត់ទៅរាយការណ៍ប្រាប់អាជ្ញាធរមូលដ្ឋានឲ្យមកជួយធ្វើ អន្តរាគមន៍ និងពិនិត្យនៅកន្លងកើតហេតុ។

ក្រោយពីទទួលបានព័ត៌មាន ហើយក្រុមការងារក្រោមឲ្យវាទរបស់លោកបានមកដល់កន្លែងកើតហេតុភ្លាមៗ ដើម្បីជួយអន្តរាគមន៍ដលក្រុមគ្រួសារជនរងគ្រោះទាំងបីខាងលើ ក្នុងគោលបំណងជួយឲ្យផុតពីគ្រោះថ្នាក់ កើត ឡើងជាយថាហេតុ។ ជនរងគ្រោះទាំងបីគ្រួសារ ដែលម្ចាស់ផ្ទះរងគ្រោះទី១ ឈ្មោះ ហ៊ូ សារឿន ទី២ ឈ្មោះ រឿង សាវ៉ាន ទី៣ ឈ្មោះ អាត សេងហួត ផ្ទះដែលបាក់ស្រុតទាំងស្រុងនៅកណ្តាលគេ គឺផ្ទះរបស់លោក រឿង សាវ៉ាន។

ប្រភព បន្តថា ក្រោយពីបានជួយអន្តរាគមន៍ និងសង្គ្រោះដល់ប្រជាពលរដ្ឋ លោកចៅសង្កាត់ស្ទឹងមានជ័យបានសំណូមពរថា ធ្វើយ៉ាងណាសូមឲ្យប្រជាពលរដ្ឋទាំងអស់រស់នៅក្នុងមូលដ្ឋាន មេត្តាធ្វើផ្ទះសំបែងឲ្យស្របតាមបទកដ្ឋានបច្ចេកទេស ដើម្បីជៀសវាងគ្រោះថ្នាក់ផ្សេងៗ៕