ឃុំខ្លួននិសិ្សតពីរនាក់ ដែលវាយនិងផ្ទុះអាវុធ

និស្សិត​សាកលវិទ្យាល័យ​ជាតិ​គ្រប់គ្រង ២​នាក់ ត្រូវបាន​ចៅក្រម​ស៊ើបសួរ នៃ​សាលាដំបូង​រាជធានី​ភ្នំពេញ សម្រេច​កាលពី​រសៀល​ថ្ងៃទី​២៧ ខែតុលា ឆ្នាំ​២០១២ ឃុំខ្លួន​ដាក់ពន្ធនាគារ ដើម្បី​រង់ចាំ​ការស៊ើបអង្កេត ករណី​វាយ​មន្ត្រី​ប៉េអឹម​ម្នាក់​ឱ្យ​បែកក្បាល និង​ផ្ទុះអាវុធ បណ្តាលឱ្យ​ប្រធាន​សន្តិសុខ​ឯកជន​ម្នាក់ទៀត រងរបួស​ជើង​ធ្ងន់ធ្ងរ និង​ស្រាវជ្រាវ​រក​គូកន​មួយចំនួនទៀត ដែល​គេចខ្លួនបាត់​។

​លោក សុខ រឿន ព្រះរាជអាជ្ញារង​អម​សាលាដំបូង​រាជធានី​ភ្នំពេញ បានសម្រេច​ចោទប្រកាន់​ឈ្មោះ កាន់ វណ្ណ​ដេ​យ៉ែ​ល អាយុ ១៨​ឆ្នាំ ជា​និស្សិត​សាកលវិទ្យាល័យ​ជាតិ​គ្រប់គ្រង ស្នាក់​នៅផ្ទះ​លេខ​០៣ ផ្លូវ​លេខ​៧០ សង្កាត់​បឹងកក់​ទី​១ ខណ្ឌទួលគោក និង​ឈ្មោះ សុខ លឿង អាយុ ១៩​ឆ្នាំ និស្សិត​នៅ​សាកលវិទ្យាល័យ​ជាតិ​គ្រប់គ្រង មាន​ទីលំនៅ​ក្នុង​សង្កាត់​ទួល​សង្កែ ខណ្ឌឫស្សីកែវ និង​គូកន ពីបទ ហិង្សា​ដោយ​ចេតនា​មាន​ស្ថាន​ទម្ងន់ទោស រួច​បញ្ជូន​សំណុំរឿង​ទៅឱ្យ​ចៅក្រម​ស៊ើបសួរ​ចាត់ការ​បន្ត​តាម​នីតិវិធី​។

​អង្គ​ហេតុដែល​នាំឱ្យមាន​ការចោទប្រកាន់​នេះ បាន​កើតឡើង​កាលពី​យប់​ថ្ងៃទី​២៤ ខែតុលា ឆ្នាំ​២០១២ នៅ​ចំណុច​ហាង​ទំនើប​មីតធីង​ម៉ា​ត មាន​ទីតាំង​ផ្ទះ​លេខ​១ ផ្លូវ​លេខ​១១៨ សង្កាត់​ផ្សារ​ថ្មី​ទី​១ ខណ្ឌដូនពេញ ខណៈពេល​ដែលមាន​ក្រុមយុវជន ៣​នាក់ កំពុង​អង្គុយ​ផឹកស៊ី​នៅ​ទីនោះ ហើយ​មាន​មន្ត្រី​ប៉េអឹម និង​មិត្តភក្តិ ៣ ទៅ ៤​នាក់ ក៏​អង្គុយ​ផឹកស៊ី​នៅក្បែរ​តុ​នោះដែរ​។

​ក្រោយមក​ក្រុម​ទាំងពីរ​បាន​កាច់​កុង ឌឺដង​សម្តី​ដាក់គ្នា ហើយ​ឈាន​មានការ​ប្រទូសរ៉ាយ​វាយតប់​គ្នា​កើតឡើង ដោយ​ក្រុមយុវជន​បាន​យក​ដប​ស្រា​បៀរ​មក​វាយ​ក្បាល​ឈ្មោះ រ័ត្ន ភក្ត្រា អាយុ ២៤​ឆ្នាំ ជា​មន្ត្រី​ប៉េអឹម បណ្តាល​ឲ្យ​បែកក្បាល ហើយ​ក្រុមយុវជន​ទាំងនោះ​បាននាំគ្នា​រត់គេច​ខ្លួន បន្ទាប់ពី​មាន​អន្តរាគមន៍​ពី​អាជ្ញាធរ​មូលដ្ឋាន ដោយបាន​បន្សល់ទុក​នូវ​ម៉ូតូ​មួយគ្រឿង ម៉ាក​ស្តេ​ប នៅ​កន្លែងកើតហេតុ រួច​សមត្ថកិច្ច​បាន​យកមក​រក្សាទុក​នៅ​ប៉ុស្តិ៍​ផ្សារ​ថ្មី​១​៕