លោក ឆាន ឆាយ ហៅម៉ៅ ជាមន្ត្រីប៉ូលីសនៅអធិការដ្ឋាននគរបាលស្រុកអន្លង់វែង យកតួនាទីរបស់ខ្លួន ប្រើប្រាសរថយន្តពាក់ស្លាកលេខ ខេមរភូមិន្ទ និង ពាក់ស្លាកលេខ នគរបាល រកស៊ីដឹកបទល្មើសព្រៃឈើ យ៉ាងសកម្ម ដែលបណ្តាលអោយប៉ះពាល់កិត្តិយសដល់ស្ថានប័នរដ្ឋ ថែមទាំងប្រឆាំងទៅនឹងបទបញ្ជារបស់រាជរដ្ឋាភិបាលកម្ពុជាទៀតផង។
ព័ត៌មានបែកធ្លាយពីស្រុកអន្លង់វែងមកថា កាលពីថ្ងៃទី១៨ ខែវិច្ឆកា ឆ្នាំ២០១៩ វេលាម៉ោង៨យប់ខាងកងរាជអាវុធហត្ថបានឃាត់រថយន្តដឹកឈើមួយគ្រឿងពណ៍ត្រេអ៊ី ពាក់ស្លាកលេខ ខេមរភូមិន្ទ ០៦(២៦៦២៧) ក្នុងចំណោមរថយន្តបីគ្រឿង បន្ទាប់ពីអ្នកកាសែតបានរាយការណ៍ទៅ ក្រោមបញ្ជារបស់លោក ប៉េង ម៉េងគ័ង ព្រះរាជអាជ្ញារងអមសាលាដំបូងខេត្តឧត្តរមានជ័យ ហើយបន្ទាប់មកវត្ថុតាង និងមធ្យោបាយដឹកជញ្ជូន ត្រូវបានបញ្ជូនយកទៅទុកនៅសង្កាត់រដ្ឋបាលព្រៃឈើ ស្រុកអន្លងវែង បានមួយចំអិនកំពឹស ក៏ត្រូវបានដោះលែងទៅវិញ ដោយសំអាងថា លោកព្រះរាជអាជ្ញារងសុំបិណ្ឌបាត បើទោះជារថយន្តដឹកឈើកែថ្នៃនោះគ្មានច្បាប់អនុញ្ញាតក៏ដោយ។
ម្ចាស់រថយន្តដឹកឈើខាងលើនេះ ត្រូវបានគេស្គាល់ថាឈ្មោះ ឆាន ឆាយ ហៅម៉ៅ ជាមន្ត្រីប៉ូលីសនៅអធិការនគរបាលស្រុកអន្លង់វែង ហើយថ្ងៃដែលសមត្ថកិច្ចឃាត់រថយន្តខាងលើ គឺលោក ឆាន ឆាយ បានដឹកនាំក្បួនរថយន្តដឹកឈើចំនួនបីគ្រឿង មានពាក់ស្លាកលេខ ន.ប ផង ខ.ម ផង ចេញពីស្រុកត្រពាំងប្រាសាទ ឆ្ពោះមកស្រុកអន្លង់វែង តាមផ្លូវក្រវាត់ព្រំដែន បន្ទាប់មកកម្លាំងកងរាជអាវុធហត្ថចាប់បានរថយន្តដឹកឈើមួយគ្រឿងខាងលើ នៅចំណុចមុខសាលារៀន១០៥ ស្ថិតក្នុងភូមិ១០៥ ឃុំផ្អាវ ស្រុកត្រពាំងប្រាសា ខេត្តឧត្តរមានជ័យ ឯចំណែករថយន្តដឹកឈើពីរគ្រឿងទៀតត្រូវបានបើកបរទៅដោយរលួន ព្រោះមិនមានសមត្ថកិច្ចណាចុះចាប់នោះទេ។
នៅរសៀលថ្ងៃទី២៥ ខែវិច្ឆការ ឆ្នាំ២០១៩នេះ លោក គង់ សារ៉េត នាយសង្កាត់រដ្ឋបាលព្រៃឈើស្រុកអន្លង់វែងបានបដិសេធតាមទូរស័ព្ទថា ថ្ងៃនោះលោកមិនមានវត្តមាននៅស្នាក់ការទេ លោកមិនបានដឹងរឿងហេតុអីទេ បើទោះប្រភពបានអះអាងថា លោកនាយសង្កាត់រូបនេះបានបញ្ជាអោយកូនចៅរបស់ខ្លួនយករថយន្តដឹកឈើចូលដល់ក្នុងស្នាក់ការរបស់ខ្លួន រួចដោះលែងទៅវិញក៏ដោយ។
នៅថ្ងៃទី២៥ដដែលនេះ ឯកឧត្តម ម៉ែន លី ស្នងការនគរបាលខេត្តឧត្តរមានជ័យបានមានប្រសាសន៍តាមទូរស័ព្ទយ៉ាងខ្លីថា ឯកឧត្តមពិតជាមិនបានដឹងរឿងហេតុខាងលើនេះទេ ប៉ុន្តែស្នើរសុំអោយអ្នកកាសែតជួយធ្វើតាមច្បាប់ផង។
ចំណែកឯលោក ប៉េង ម៉េងគ័ង ព្រះរាជអាជ្ញារងអមសាលាដំបូងខេត្តឧត្តរមានជ័យ បានមានប្រសាសន៍តាមទូរស័ព្ទនៅរសៀលនេះផងដែរថា លោកពិតជាបានអោយគេដោះលែងរថយន្តដឹកឈើខាងលើនេះមែន ដោយសំអាងថា ម្ចាស់រថយន្តបានប្រាប់ថា គាត់ដឹកទ្វារយកមកធ្វើផ្ទះ មិនមែនជាអ្នករកស៊ីដឹកឈើទេ ហើយទើបតែដឹកលើកទីមួយ តែលោកក៏បានអោយម្ចាស់រថយន្តដឹកឈើសន្យាដែរថា កុំអោយមានការដឹកជញ្ជូនអត់ច្បាប់ទំលាប់ចឹងទៀត។ លោកព្រះរាជអាជ្ញារងបានបន្ថែមថា លោកពុំដែលបានដឹងពុំបានចាប់រថយន្ត ឬចាប់ឈ្មោះម្ចាស់រថយន្តដឹកឈើនេះពីមុនមកទេ ហើយបើអ្នកកាសែតដឹងថា គាត់ជាអ្នករកស៊ីដឹកបទល្មើសព្រៃឈើយ៉ាងសកម្មដូច្នេះ ចុះម្តេចមិនរាយការណ៍ជូនលោកកាលពីដឹកមុនៗ ហេតុអ្វីទើបតែរាយការណ៍ពេលនេះ លោករីករាយណាស់បើបានអ្នកកាសែតចូលរួមរាយការណ៍អំពីបទល្មើសជូនលោក ហើយលោកនឹងសហការជានិច្ចក្នុងការបង្ក្រាបបទល្មើស។
លោក ឆាន ឆាយ ហៅម៉ៅ បានប្រាប់តាមទូរស័ព្ទនៅរសៀលថ្ងៃទី២៥នេះថា ឈើខាងលើនេះគឺលោកដឹកយកមកធ្វើផ្ទះ ជាគ្រឿងសិប្បកម្មទ្វារបង្អួច មិនមែនអ្នករកស៊ីដូចការចោទប្រកាន់ទេ បើទោះជាប្រភពព័ត៌មានបានប្រាប់ថា លោក ឆាន ឆាយ បានប្រើរថតន្តបីគ្រឿងដឹកឈើជារៀងរាល់ថ្ងៃពីស្រុកត្រពាំងប្រាសាទ យកទៅលក់នៅឯខេត្តបន្ទាយមានជ័យ រយះពេលជាងមួយខែកន្លងទៅហើយក៏ដោយ។
ពលរដ្ឋអ្នកតាមដានហេតុការណ៍ខាងលើនេះ ស្នើរសុំទៅ ឯកឧត្តម ម៉ែន លី ស្នងការនគរបាលខេត្តឧត្តរមានជ័យ និង នាយខណ្ឌរដ្ឋបាលព្រៃឈើខេត្តឧត្តរមានជ័យមេត្តា ចាត់ចែងមន្ត្រីខិលខូចក្រោមឱវាទខាងលើនេះផង ជៀសវាងប៉ះពាល់ដល់កិត្តិយសដល់ថ្នាក់ដឹកនាំ ដើម្បីអោយស្របទៅតាមប្រសាសន៍របស់រាជរដ្ឋាភិបាលដែលតែងតែប្រកាសថា សុំអោយកងកម្លាំងប្រដាប់អាវុធកុំអោយពាក់ព័ន្ធរឿងបទល្មើសព្រៃឈើ៕ ដោយ៖ ផ្លុង រ៉េត
.jpg)
.jpg)
.jpg)
.png)
.jpg)
.jpg)
