មានសត្វតិរច្ឆានលួចគាស់ផ្នូរសពគ្រីស្ទានយកធាតុបោះចោលក្នុងព្រៃ

ដីកប់សពគ្រីស្ទាន ស្ថិតក្នុងភូមិបុស្សក្រឡាញ់ សង្កាត់ជ្រាវ ក្រុងសៀមរាប ត្រូវបានបុគ្គលមួយក្រុម ឃុប​ឃិតគ្នាយកដីលក់ ហើយលួចគាស់ផ្នូរសពដោយគ្មានការឯកភាព ពីក្រុមគ្រួសារសពមួយចំនួន រហូតដល់មានរឿងចម្រូង​ចម្រាស ប្ដឹងផ្ដល់គ្នាដល់សាលាក្រុងសៀមរាប និងមន្ទីរធម្មការនិងសាសនា តែជាលទ្ធផល គ្មានដំណោះស្រាយណាមួយដែលសមស្រប អាចឲ្យម្ចាស់ផ្នូរសពទទួលយកបានឡើយ។

ផ្នូរសពគ្រីស្ទានមួយចុងក្រោយ ដែលសាច់ញាតិក្រុមគ្រួសារសព មិនព្រមគាស់ចេញពីដីកប់សព និងមិនព្រមទទួលយកប្រាក់សូកប៉ាន់ពីក្រុមអ្នកលក់ដីកប់សព ឥឡូវត្រូវបានពួកសត្វតិរច្ឆានមិន​ស្គាល់មុន លួចគាស់ផ្នូរសព រួចយកធាតុបោះចោលទៅក្នុងព្រៃ។

ព្រោះតែការលោភលន់ ធ្វើឱ្យមនុស្សលែងស្គាល់បុណ្យបាប សូម្បីតែដីកប់សពក៏ពួកគេសម្រេចចិត្ត លក់យកលុយ​ដាក់ហោប៉ៅ ដើម្បីធ្វើមានបានលើគំនរទុក្ខអ្នកដទៃបានដែរ។

យោងតាមមាត្រា-២៦១ នៃក្រមព្រហ្មទណ្ឌនៃព្រះរាជាណាចក្រកម្ពុជា​បានចែងថា អំពើប៉ះពាល់ដល់បូរណភាពនៃសាកសព ត្រូវផ្ដន្ទាទោសដាក់ពន្ធនាគារពី ១(មួយ) ខែ ទៅ ១(មួយ) ឆ្នាំ និងពិន័យជាប្រាក់ពី ១០០,០០០ (មួយសែន)រៀល ទៅ ២,០០០,០០០ (ពីរលាន)រៀល។

ទន្ទឹមនឹងនេះ​មាត្រា-២៦២ នៃក្រមព្រហ្មទណ្ឌនៃព្រះរាជាណាចក្រកម្ពុជាបានកំណត់ថា អំពើប្រមាថតាមមធ្យោ​បាយ​ណាមួយក៏ដោយ ទៅលើផ្នូរ ទីបញ្ចុះសព កោដ្ឋ ឬទៅលើសំណង់ដែលកសាងឡើង សម្រាប់រំលឹកវិញ្ញាណក្ខន្ធនៃអ្នកទទួលមរណភាព ត្រូវផ្ដន្ទាទោសដាក់ពន្ធនាគារពី ១ (មួយ) ខែ ទៅ ១ (មួយ) ឆ្នាំ និងពិន័យជាប្រាក់ពី ១០០,០០០ (មួយសែន) រៀល ទៅ ២,០០០,០០០ (ពីរលាន) រៀល ផងដែរ។

ម្ចាស់ផ្នូរសពគ្រីស្ទានដង្ហើយសុំ​អាជ្ញាធរគ្រប់ជាន់ថ្នាក់ សមត្ថកិច្ចពាក់ព័ន្ធ ជាពិសេសតុលាការខេត្តសៀមរាបមេត្តាស៊ើបអង្កេតករណីខាងលើនេះផង ដើម្បីផ្តល់យត្តិធម៌ដល់គ្រួសារសព ដែលជាពលរដ្ឋខ្មែរកំពុងតែរងការជិះជាន់គៀបសង្កត់ពី​ក្រុមអ្នកមានលុយមានអំណាច៕ ដោយៈ ផ្លុង រ៉េត