កម្មករដាក់សំណើរ៩ចំនុចឲក្រុមហ៊ុនក្តារបន្ទះលទ្ធផលទទួល៨សល់១ចំនុច

លទ្ធផលនៃការចរចាគ្នារវាងកម្មករប្រមាណជាង ៣០០នាក់និងក្រុមហ៊ុនកែច្នៃឈើ ឈ្មោះ Angkor Flywood Co.,Ltd ដែលមានទីតាំងនៅភូមិអណ្តូងច្រុះ ឃុំអម្ពិល ស្រុកកំពង់សៀមខេត្តកំពង់ចាម ភាគីកម្មករ និងគាគីរោងចក្របានព្រមព្រៀងគ្នាចំនួនប្រាំបីចំណុច នៅសល់មួយចំណុចនឹងលើកយកទៅពិភាក្សាគ្នានៅបំណាច់ឆ្នាំ២០១២ ខាងមុខ ។
    
លោក សារឿន ឆៃអៀ ជាតំណាងកម្មករដែលបានចូលរួមការចរចានៅក្នុងរោងចក្របានប្រាប់ ថា ក្នុងកិច្ចចរចានោះ ខាងក្រុមហ៊ុនបានយល់ព្រមលើចំណុច ទី១-អនុញ្ញាតឲ្យដែលជាអ្នកមានផ្ទៃពោះ ចេញពីធ្វើការមុន ១០ នាទី។ ទី២-យល់ព្រមបើកប្រាក់ខែ ដែលកម្មករក្នុងម្នាក់ទទួលបានចាប់ពី ៨.០០០ ទៅ ៩.០០០ រៀលនោះ ឲ្យបានទៀងទាត់ ក្នុងថ្ងៃទី១០ ជារៀងរាល់ខែ បើទោះជាចំថ្ងៃអាទិត្យក៏ដោយ។ ទី៣-យល់ព្រមដំឡើងប្រាក់បំណាច់ខែ ចំពោះកម្មករណា ដែលបានចូលធ្វើការងារចាប់ពីបីខែឡើងទៅ។ ទី៤-ពេលកម្មករសុំច្បាប់ឈប់ ពីរថ្ងៃ ក្នុងមួយខែនោះ ក្រុមហ៊ុនមិនកាត់លុយទេ តែត្រូវជូនដំណឹងឲ្យបានមុនរយៈពេលពីរថ្ងៃ។ ទី៥-ចំពោះកម្មករណាអត់បានធ្វើការនៅថ្ងៃសៅរ៍ គឺអាចមកធ្វើការនៅថ្ងៃអាទិត្យបាន និងមិនកាត់លុយ តែត្រូវមានមូលហេតុច្បាស់លាស់។ ទី៦-យល់ព្រមឲ្យមានប្រាក់បំណាច់ឆ្នាំ។ ទី៧-អត់ធ្វើការថ្ងៃអាទិត្យ មិនត្រូវបានកាត់ប្រាក់ឡើយ និងទី៨-សុំចេញពីធ្វើការនៅម៉ោង ៤ ល្ងាច ដោយមិនកាត់ប្រាក់៕