ព្រះករុណា​ព្រះមហាក្សត្រ​និង​សម្តេចម៉ែ​ស្តេចយាង​គោរព​វិញ្ញាណ​ក្ខ័​ន្ធ អ្នកឧកញ៉ា​មហា​ភក្តី សប្បុរិស​ភោ

​នៅ​ព្រឹក​ព្រលឹម​ថ្ងៃទី ១៣ ខែកក្កដា ឆ្នាំ ២០១៣ ព្រះករុណា ព្រះបាទ​សម្តេច ព្រះបរមនាថ នរោត្តម សីហមុនី ព្រះមហាក្សត្រ នៃ​ព្រះរាជាណាចក្រ​កម្ពុជា និង​សម្តេចព្រះរ​វ​រាជមាតា​ជាតិខ្មែរ ជាទី​សក្ការៈ​ដ៏​ខ្ពង់ខ្ពស់​បំផុត​ដែល​ប្រកបដោយ​ព្រះភ័ក្ត្រ​ស្រពាប់​ស្រពោន​បានបង្ហាញ​ព្រះរាជ​វត្តមាន​ក្នុងភូមិ​គ្រឹះ​របស់​សម្តេច​អគ្គមហាសេនាបតី​តេ​ជោ ហ៊ុន សែន និង​សម្តេច​កិត្តិ​ព្រឹទ្ធ​បណ្ឌិត ប៊ុន រ៉ានី ហ៊ុនសែន ក្បែរ​វិមានឯករាជ្យ​ក្នុង​រាជធានី​ភ្នំពេញ​ជាទី​ដែល​ព្រះករុណា​ជា​អ​ម្ចាស់ជីវិតលើត្បូង​បាន​គោរព​វិញ្ញាណ​ក្ខ័​ន្ធ​អ្នកឧកញ៉ា​មហា​ភក្តី​នៅ​ទីនោះ​។​

អ្នកឧកញ៉ា​មហា​ភក្តី​សប្បុរិស​ភោ​គា​ធិបតី ហ៊ុន នាង បានទទួល​មរណភាព កាលពី​វេលា​ម៉ោង ៤ និង ១០ នាទី​ទៀបភ្លឺ​ថ្ងៃទី​១២ ខែកក្កដា ឆ្នាំ ២០១៣ ត្រូវ​នឹង​ថ្ងៃ​សុក្រ ៥ កើត​ខែ​អាសាធ ឆ្នាំម្សាញ់ បញ្ច​ស័ក ពុទ្ធសករាជ​២៥៥៧​ក្នុង​ជន្មាយុ ៩០ ឆ្នាំ ដោយ​ជរាពាធ​។​

នាឱកាស​នោះ​ព្រះមហាក្សត្រ និង សម្តេចម៉ែ បាន​សំដែង​នូវ​ព្រះទ័យ​សោកសៅ និង​ចូលរួម​សោកស្តាយ ជាមួយ​សម្តេច​តេ​ជោ ហ៊ុន សែន និង ក្រុមគ្រួសារ ដែល​បាន​បាត់បង់​នៅ​បិតា ជីតា ជីតា​ទួត ជាទី​ស្រឡាញ់ និង ជាទីគោរព​។ ព្រះមហាក្សត្រ និង សម្តេចម៉ែ បាន​មាន​ព្រះបន្ទូល​ទៀតថា មរណភាព​នេះ គឺជា​ការបាត់បង់​បិតា ជីតា ជីតា​ទួត ដ៏​ល្អ ជាទី​ស្រលាញ់ និង​ជាទីគោរព​ដ៏​ជ្រាលជ្រៅ​ជាទីបំផុត​របស់​សម្តេច សម្តេច​កិ​ក្តិ​ព្រឹទ្ធ​បណ្ឌិត និង​បុត្រា បុត្រី ព្រមទាំង​ចៅប្រុស​ចៅស្រី​ទាំងអស់​។​

​សម្រាប់​ការអញ្ជើញ​ចូលរួម​គោរព​វិញ្ញាណ​ក្ខ័​ន្ធ​អ្នកឧញ៉ា​មហា​ភក្តី នៅពេល​ព្រឹក​នោះ​ក៏មាន​ផងដែរ គណៈប្រតិភូ​ក្រសួងព្រះបរមរាជវាំង​ដឹកនាំ​ដោយ​សម្តេចចៅហ្វា​វាំង​គង់ សំអុល ឧបនាយករដ្ឋមន្ត្រី រដ្ឋមន្ត្រី​ព្រះបរមរាជវាំង គណៈប្រតិភូ​រដ្ឋសភា​ដឹកនាំ​ដោយ​សម្តេច​អគ្គ​មហា​ពញា​ចក្រី ហេង សំរិន ប្រធានរដ្ឋសភាជាតិ ស្ថាប័នព្រឹទ្ធសភា​ដឹកនាំ​ដោយ​ឯកឧត្តម សាយ ឈុំ អនុប្រធាន​ទី​១ ព្រឹទ្ធសភា គណៈប្រតិភូ​គណបក្ស​ប្រជាជន​កម្ពុជា ដឹកនាំ​ដោយ​ឯកឧត្តម ទេព ង​ន សមាជិក​អចិន្ត្រៃយ៍​គណៈកម្មាធិការ​កណ្តាល​គណបក្ស​ប្រជាជន​កម្ពុជា គណៈប្រតិភូ​ក្រសួងការបរទេស និង​សហប្រតិបត្តិការ​អន្តរជាតិ​ដឹកនាំ​ដោយ​ឯកឧត្តម ឧបនាយករដ្ឋមន្ត្រី ហោ ណាំហុង រដ្ឋមន្ត្រី​ក្រសួងការបរទេស និង​សហប្រតិបត្តិការ​អន្តរជាតិ គណៈប្រតិភូ​តុលាការ​កំពូល សាលា​ឧ​ទ្ទរ និង​សាលាដំបូង ដឹកនាំ​ដោយ​ឯកឧត្តម ឌិ​ត មន្ទីរ គណៈប្រតិភូ​ក្រសួង​ទំនាក់ទំនង​ជាមួយ​រដ្ឋ​សភា ព្រឹទ្ធសភា​និង​អធិការកិច្ច ដឹកនាំ​ដោយ​លោកជំទាវ​បណ្ឌិត ឧបនាយក​​រដ្ឋមន្ត្រី ម៉ែន សំអន គណៈប្រតិភូ​ក្រសួងការពារជាតិ ដឹកនាំ​ដោយ​ឯកឧត្តម ឧបនាយករដ្ឋមន្ត្រី ទៀ បាញ់ ហើយ​គណៈប្រតិភូ​របស់​កាកបាទក្រហមកម្ពុជា ក៏បាន​ដឹកនាំ​ដោយ​សម្តេចចៅហ្វា​វាំង  គង់ សំអុល ផងដែរ​៕​